Эксперты абяцаюць да 2020 года вынішчыць баршчэўнік у рэгіёне. Камунальнікі і эколагі працуюць не толькі з баршчэўнікам, але і сумнікам канадскім, паведамляе grodnonews.by.
Як паведаміў начальнік Гродзенскай гарадской і раённай інспекцыі прыродных рэсурсаў і аховы навакольнага асяроддзя Вадзім Палякоў, толькі ў гэтым годзе ліквідавана 10 ачагоў росту баршчэўніка. Калі ў 2014 годзе інвазіўныя расліны займалі ў горадзе плошчу ў 11,3 гектара, то сёлета — 1,6 гектара.
Вядзецца барацьба з сумнікам канадскім, які расце на тэрыторыі мікрараёнаў індывідуальнай жылой забудовы Баранавічы-5,6 і Баранавічы-7. Стыхійныя пасевы знішчаны механічным спосабам.
Яшчэ адна інвазіўная расліна — ясенелісны клён — высечана ў раёне вуліцы Гагарына.
Баршчэўнік не толькі выцясняе мясцовыя віды, але і небяспечны для людзей: у ім змяшчаюцца фуранакумарыны — рэчывы, якія пры кантакце са скурай павышаюць яе адчувальнасць да ўльтрафіялету. Гэта, у сваю чаргу, можа стаць прычынай моцнага апёку. Сумнік не так шкодны для людзей, але яго карані выпрацоўваюць інгібітары — рэчывы, якія душаць рост іншых раслін. Ён уяўляе пагрозу для большасці лугавых насякомых, птушак, дробных млекакормячых. Займаючы любы ўчастак, сумнік цалкам змяняе яго раслінны і жывы свет. Тым жа для мясцовых відаў клёну шкодны ясенелісны інвазіўны клён.
