У Гродне прайшоў комплекс мерапрыемстваў «Быт», накіраваны на папярэджанне бытавых злачынстваў. У склад працоўных груп уваходзяць прадстаўнікі міліцыі, МНС, аховы здароўя, ЖКГ. З пачатку года ў вобласці зарэгістраваны 26 сур’ёзных бытавых злачынстваў, у мінулым годзе за аналагічны перыяд іх было 20, піша grodnonews.by.
— Барацьба з бытавымі злачынствамі вядзецца круглы год. За першае паўгоддзе да нас паступілі 1218 паведамленняў аб бытавых канфліктах рознага характару. Рабочыя групы наведалі сем'і, у якіх ёсць агрэсары, якія стаяць у нас на ўліку, а такіх амаль 200 грамадзян. Калі чалавек больш за два разы за год прыцягваўся да адказнасці, уносім яго ў базу дадзеных. Удзяляем увагу і тым, каму ўдалося пазбегнуць адказнасці за гвалт у адносінах да сваіх дамачадцаў. Здараецца гэта тады, калі агрэсар і ахвяра пагаджаюцца і заяву з міліцыі забіраюць. Калі даведаемся, што крыўдзіцель і далей прыменяе сілу, вырашаем пытанне аб прыцягненні яго да адказнасці праз пракуратуру. А калі справа ўзбуджаная праз пракуратуру, то агрэсар і ахвяра ўжо не змогуць прымірыцца, — адзначае начальнік аддзела аховы правапарадку і прафілактыкі АУС адміністрацыі Кастрычніцкага раёна Гродна Вадзім Палякоў.
Часцей за ўсё прычынай гвалту ў сям'і становіцца алкаголь. У гэтым годзе ў вобласці шэраг канфліктаў скончыўся гібеллю аднаго з удзельнікаў, у 14-ці выпадках ахвяры атрымалі цяжкія цялесныя пашкоджанні. Асноўная задача такіх мерапрыемстваў, як «Быт», — прадухіліць падобныя трагедыі і як мага раней засцерагчы сям’ю ад агрэсара.
— Да кожнай сям'і індывідуальны падыход, бо ў нас не стаіць задача прыцягнуць як мага больш людзей да адказнасці. Наадварот, усімі сіламі спрабуем прывесці чалавека ў норму, спыніць яго сацыяльнае выгаранне, прыцягваючы для гэтага псіхолагаў і, калі трэба, нарколагаў, — адзначае Вадзім Палякоў.
Як распавёў Вадзім Палякоў, далёка не ўсе разумеюць, што ім можа пагражаць як адміністрацыйная, так і крымінальная адказнасць за іх дзеянні. Таму праваахоўнікі даносяць і гэтую інфармацыю. Сур’ёзная работа праводзіцца і з ахвярамі гвалту.
Многія проста замоўчваюць тое, што адбываецца з імі. Хтосьці баіцца, ёсць тыя, хто знаходзіцца ў якой-небудзь залежнасці ад крыўдзіцеля. Яны могуць атрымаць дапамогу, патэлефанаваўшы ў міліцыю або па тэлефоне гарачай лініі 77−10−73, ёсць і агульнанацыянальны нумар — 8−801−100−88−01. У Гродне працуе крызісны пакой, дзе пацярпелыя могуць перачакаць бяду.
Супрацоўнікі міліцыі па-рознаму даведваюцца пра канфлікт у сям'і: заяўляе сама ахвяра, медыкі, калі да іх паступае чалавек, якога магчыма збілі, не маўчаць і суседзі. У любым выпадку праваахоўнікі прапануюць ахвяры падпісаць згоду на перадачу інфармацыі ў тэрытарыяльныя цэнтры сацыяльнай абароны, каб там знайшлі псіхолага для пацярпелага і аказалі іншую патрэбную дапамогу.
— Мы абавязкова прапануем план бяспекі, распрацоўваем яго. Гэта алгарытм дзеянняў па прадухіленні цяжкіх злачынстваў. Напрыклад, агрэсар абрывае тэлефонную лінію, а мабільным тэлефонам дазваляе карыстацца толькі ў яго прысутнасці. План бяспекі, напрыклад, прадугледжвае наяўнасць кодавага слова ці словазлучэння, якія будуць азначаць, што здарылася бяда. Дапусцім, крыўдзіцель дазволіў сваёй жонцы патэлефанаваць маці, і ахвяра ўводзіць у размову кодавае слова. Тады яе маці разумее, што трэба звярнуцца ў міліцыю, — адзначыў Вадзім Палякоў.
Ва УУС аблвыканкама распавялі, што ўсяго за час правядзення СКМ «Быт» распачатыя 11 крымінальных спраў прэвентыўнай накіраванасці. Па месцы жыхарства спецыяльныя міжведамасныя групы наведалі парадку 900 сем’яў, дзе ёсць агрэсары, якія стаяць на прафілактычным уліку ў міліцыі і здзяйснялі злачынствы ў дачыненні да членаў сям'і. Таксама праведзена 300 выступаў у арганізацыях і 1177 прафілактычных гутарак па месцы жыхарства сем’яў. Суд разгледзеў 24 справы, па рашэнні якіх агрэсараў накіравалі ў ЛПП.
