Туалетны блогер Карына Шлапакова з Санкт-Пецярбурга ў пачатку жніўня пабывала ў Гродне і зняла невялікі ролік пра самыя крутыя прыбіральні горада.
Блогерка выбрала крэатыўныя прыбіральні бараў «Фарадэй» і «Гудзіні».
«Магу з упэўненасцю сказаць, што тыя ўстановы, у якіх я была, выглядалі годна, — распавядае Карына. — Гэта больш чым здавальняюча. Чыста і з разыначкай. Але я мэтанакіравана ішла ў гэтыя ўстановы. Мне іх падказалі. Казаць пра іншыя ў горадзе складана».
Свой першы туалет Карына зняла ў Санкт-Пецярбургу падчас Чэмпіянату свету па футболе. У той прыбіральні дзяўчыну скарыў экран, на якім паказвалі прамы эфір матчу.
«Гэта быў мой першы рэпартаж. Тады я нават не думала гэта кудысьці выкладваць. Пазней відэа мне спатрэбілася. Цяпер людзі самі дасылаюць мне спасылкі на ўстановы і раяць куды схадзіць, каб здзівіць. Так атрымалася і з Гродна. У Беларусі гэта пакуль першы горад. Ёсць дзве ўстановы, якія хачу зняць у Віцебску, але ніяк з часам пакуль не атрымліваецца», — дадала Карына.
