Гродзенскага сабаку, які ўзімку парваў хлопчыку твар, а ў чэрвені ўкусіў малую дзяўчынку, усыпілі. Сабака не хварэў на шаленства, гэта рашэнне гаспадара.
Сабаку трымалі на каранціне ў Гродзенскай гарадской ветэрынарнай станцыі 10 дзён пасля таго, як ён укусіў дзіця, піша s**boda.org.
Зоаабаронца Тацяна Красільнікава расказала, што рашэнне забіць сабаку было не прымусовым, а добраахвотным з боку гаспадара. Гадаванцу было каля 1 года.
Па словах Красільнікавай, якая каля 20 гадоў займаецца стафардшырскімі тэр’ерамі і пітбулямі, сабака быў не чыстым стафам, а мяшанцам, незвычайна для гэтай пароды высокага росту. Яна мела магчымасць назіраць за гэтым сабакам незадоўга да таго, як яго ўсыпілі. Па ўражаннях зоаабаронцы, гадаванец не быў агрэсіўным, хутчэй запужаным і нявыхаваным.
Экспэртка сцвярджае, што сабак, якія кепска сябе паводзяць і кідаюцца на дзяцей, можна перавыхаваць да двух гадоў. Дрэсіроўка можа заняць усяго месяц. Па ейных словах, паводзіны гадаванца залежаць не ад «небяспечнай» пароды, а ад стаўлення людзей. Яна прапаноўвала гаспадарам забраць сабе гэтага сабаку, аднак яны не пагадзіліся.
Закона, па якім можна было з забраць сабаку з сям'і, няма, бо гэта прыватная ўласнасць, тлумачыць Тацяна Красільнікава. Аднак такое рашэнне можа прыняць суд. Неўзабаве распачнецца разгляд справы па выпадку, калі гэты мяшанец стафа разарваў твар дзіцяці.
Хацелі разводзіць шчанюкоў. Кінолаг, РАУС і адвакат пра выпадак са стафам, які двойчы кусаў дзяцей
Вядома, што гэтыя ж гаспадары ўсыпілі свайго папярэдняга гадаванца з нараджэннем у сям'і дзіцяці.
На думку зоаабаронцы, такім людзям, якія не займаюцца дрэсіроўкай, трэба забараніць браць сабак або іншых жывёлаў на выхаванне. Да таго ж, яны несправядліва ствараюць негатыўны імідж іншым сабакам і іхнім гаспадарам.
