У Гродзенскай вобласці ёсць перспектывы для развіцця ўзаемавыгаднага супрацоўніцтва з польскімі рэгіёнамі ў розных сферах: ад вытворчасці і лагістыкі да культуры і турызму. Упэўненасць у гэтым выказаў старшыня Гродзенскага аблвыканкама Уладзімір Краўцоў на сустрэчы з паслом Польшчы ў Беларусі Артур Міхальскі, перадае карэспандэнт БЕЛТА. Польшча другі пасля Расіі партнёр Гродзенскай вобласці па аб’ёму экспарту і тавараабароту, і ў гэтым кірунку адзначаецца станоўчая дынаміка.
— У мінулым годзе тавараабарот узрос на 10%, экспарт тавараў з рэгіёну ў Польшчу павялічыўся на чвэрць. І сёння мы бачым, што патэнцыял далёка не вычарпаны. Важна ствараць умовы для далейшага развіцця супрацоўніцтва, — падкрэсліў Уладзімір Краўцоў.
У прыватнасці, вялікая ўвага надаецца стварэнню транспартнай інфраструктуры. Рэканструюецца пункт пропуску «Брузгі» на беларуска-польскай мяжы, ствараецца прымежны лагістычны цэнтр побач з пунктам пропуску «Бераставіца».
Адразу некалькі інвестпраектаў рэалізуюцца ў сферы чыгуначнай лагістыкі. Прапрацоўваюцца пытанні развіцця пасажырскіх перавозак, перш за ўсё чыгуначным і авіяцыйным транспартам.
Бакі абмеркавалі таксама стварэнне новага міжнароднага аўтамабільнага пункта пропуску на беларуска-польскай мяжы. Магчыма, ён з’явіцца ў раёне населеных пунктаў Сафіева і Ліпчаны, у выніку Гродна і Аўгустаў звяжа прамая дарога.
— Гродзенскі рэгіён усё больш адкрываецца для палякаў. Спрыяе гэтаму і бязвізавы рэжым. Аднак едуць сюды не толькі турысты, але і бізнесмены, узровень даверу расце, а значыць, усё больш будзе і сумесных праектаў на розных узроўнях, — адзначыў Артур Міхальскі.
Ён, дарэчы, прыехаў у Гродна з канкрэтнай прапановай. У гэтым годзе адзначаецца 80-гадовы юбілей Чэслава Немэна — вядомага польскага спевака, аранжыроўшчыка і кампазітара. Музыкант нарадзіўся ў вёсцы Старыя Васілішкі ў Шчучынскім раёне. Польскі бок зацікаўлены ў рэканструкцыі дома-музея Чэслава Немэна на яго радзіме. Ініцыятыву падтрымалі і ў Гродзенскай вобласці. Тэмай для абмеркавання абраная і ўстаноўка помніка музыканту ў Гродна ці Старых Васілішках. Гэта, на думку пасла, зможа дадаткова прыцягнуць у рэгіён турыстаў.
Прапрацоўваецца і стварэнне турыстычных маршрутаў, прысвечаных творчасці пісьменніцы Элізы Ажэшкі. Акрамя таго, бакі плануюць працягнуць рэалізацыю праектаў па ўладкаванні веласіпеднай інфраструктуры ў раёне Аўгустоўскага канала і ўключэнню веласіпедных маршрутаў беларускай часткі ў міжнародную веласетку. На сустрэчы былі паднятыя ў тым ліку пытанні супрацоўніцтва ў сферы адукацыі і культуры.
