Беласток непатрэбны? У Саколцы адкрыўся гандлёвы цэнтр, у 2019 адкрыецца яшчэ адзін

Першы ў польскай Саколцы (Sokółka) гандлёвы цэнтр з крамай бытавой тэхнікі «RTV euro AGD» адкрыўся 15 снежня. Побач з ім ужо працуе супермаркет Biedronka. У ГЦ ёсць месца яшчэ на некалькі крамаў, піша isokolka.eu.

Гандлёвы цэнтр невялікі - усяго 3000 кв.м. Побач павінна з’явіцца яшчэ аўтамыйка. Месца пад будову цэнтра ў 2013 годзе выкупіла ў аўтобуснага перавозчыка PKS прыватная фірма, але справа зацягнулася на пяць гадоў.

Euroby.info адзначае, што размяшчэнне гандлёвага цэнтра на мапе горада нязручнае. Саколка гэта транзітны горад і поспех шмат у чым залежыць ад размяшчэння паблізу трасы. Тыя, хто праязджае праз мястэчка, у тым ліку беларусаў, каб патрапіць у гандлёвы цэнтр павінны з’ехаць у паўднёвым кірунку, амаль на ўскраіну Саколкі.

Будуць яшчэ гандлёвыя цэнтры

Вясной 2019 года плануецца адкрыццё ў Саколцы яшчэ аднаго гандлёвага цэнтра на скрыжаванні вуліц Łąkowa i Norwida. Ён будзе ў два разы больш за адкрыты ў снежні 2018 цэнтр і будзе складацца з двух будынкаў. Там размесцяцца крамы: Stokrotka, CCC, Pepco, KIK, Hebe, Martes Sport, Jysk, Neonet, Textil Market, Top Secret і аптэка.