Пачалі з дрэў, а скончаць канцэртам. Ленінскі раён Гродна адзначае 40 год

Святкаванне юбілею пачалося 25 красавіка з высадкі алеі на вуліцы Ліможа. У гэты ж дзень у горадзе пройдзе байк-парад і флэшмоб. А на выходныя Ленінскі раён падрыхтаваў канцэрты і выставы ў цэнтры горада.

Высаджваць юбілейную алею прыехалі супрацоўнікі адміністрацым Ленінскага раёна розных гадоў, а таксама школьнікі, студэнты, ветэраны і жыхары вуліцы. Усяго было высаджана больш за 40 дрэў: ліпы, бярозы, каштаны, некалькі клёнаў і дуб.

25 красавіка ў 12.00 з вулiцы Замкавай стартаваў байк-парад, а ў 13.00 на плошчы Савецкай — моладзевы праект «Вышэй за аблокі». На 20.00 запланаваны флэшмоб ля драмтэатра.

27 красавіка ля тэатра лялек пройдзе ўрачысты канцэрт вядомага беларускага гурта, назву якога арганізатары трымаюць у сакрэце. Таксама пройдуць выставы і дэгустацыі. Пачатак у 15.00.

28 красавіка ў 12.00 святкаванні пачнуцца ў парку Жылібера. Там для гродзенцаў пройдзе канцэрт, парад аркестраў, выставы прадпрыемстваў, устаноў, арганізацый, паказальныя выступленні, будуць працаваць інтэрактыўныя спартыўныя і гульнявыя пляцоўкі. У гэты ж дзень у 15.00 у Пышках адкрыецца танцавальная пляцоўка для сталых людзей.

Гістарычная даведка

У 1978 годзе, з павелічэннем колькасці насельніцтва Гродна, паўстала неабходнасць у першым адміністрацыйным дзяленні. Тады былі створаны два раёны, якія існуюць дагэтуль: Ленінскі і Кастрычніцкі.

Калі Ленінскі раён святкуе Дзень нараджэння ў канцы красавіка, то святкаванні ў Кастрычніцкім пройдуць у траўні.