25 красавіка гарадзенскія курсы беларускай мовы «Мова Нанова» правядуць заняткі ў фармаце паэтычнай вечарыны. Госцем будзе вядомы паэт і перакладчык Віталь Рыжкоў. Гэта будзе яго трэці выступ у Гародні.
— «Еду з пэўнай перасцярогай, вядома, як і належыць ехаць у госці да гарадзенцаў кожнаму магілёўцу. Буду спрабаваць замаскіраваць рускі акцэнт, перагар ад русскай водкі і камуністычныя перакананні, хоць і не маю іх. Чакаю, у сваю чаргу, што і шаноўныя гаспадары не будуць дужа яўна правяраць мяне лічыльнікам Гейгера, а, можа быць, нават перавядуць мабільнікі на час выступа ў рэжым вібрацыі. Еду, вядома, і з намерам чарговы раз пераканацца, што чым заходней, тым менш пахіленых платоў, больш дагледжаных гаспадарак, а людзі — больш ветлівыя і інтэлігентныя,» — дзеліцца настроем і чаканнямі Віталь Рыжкоў.
[irp posts="54 102″ name="Найбольш слухачоў хадзіла на Вольскага, найменш — у маразы: курсы «Мова Нанова» ў Гродне адзначылі 4 гады"]
Віталь кажа, што вымаўляючы назву горада ў прысутнасці гарадзенца, быццам бы ідзе па мінным полі. Гародня, Горадня ці Гродна?
— «Страшна памыліцца шторазу. Відаць, у кожнага сваё — і назва, і ўяўленне. У мяне асноўнае ўражанне, што гэта вельмі прыгожы горад. Але найчасцей я думаю пра саміх гарадзенцаў, якія любяць свой горад. Вельмі шчыра. З жарсцю і рэўнасцю. З такім патрыятызмам і адданасцю, якім можна хіба пазайздросціць,» — расказвае Віталь.
На курсах ён паспрабуе разбурыць стэрэатыпы пра паэзію, літаратурныя выступы і людзей з усходу Беларусі.
Заняткі пройдуць 25 красавіка, а 19:00 ў «Партале» (Вял.Траецкая, 31). Уваход вольны.
Даведка:
Віталь Рыжкоў нарадзіўся ў Магілёве 28 красавіка 1986, жыве ў Мінску. Аўтар кнігі вершаў «Дзверы, замкнёныя на ключы». Лаўрэат прэміі «Дэбют» імя М.Багдановіча (2011), прэміі часопіса «Дзеяслоў» (2008). Фіналіст конкурсаў беларускага ПЭН-цэнтра да стагоддзя газеты «Наша Н**а» (Мінск, 2007), імя Карласа Шэрмана (Мінск, 2009).