Інфармацыя пра тое, што ў ваколіцах Новага свету плануецца знос «непрывабных» дамоў, усхвалявала некаторых гродзенцаў, у тым ліку краязнаўцаў. У гарвыканкаме распавялі Hrodna.life, што каштоўныя пабудовы ў гістарычнай частцы горада зносіць ніхто пакуль не збіраецца.
«Пад знос ідуць тыя пабудовы, якія ўяўляюць пагрозу для насельніцтва. Гэта аварыйныя і пустуючыя дамы, — распавядае намеснік старшыні гарвыканкама Андрэй Жук. — У цэнтры горада такіх пабудоў яшчэ хапае. Што тычыцца Новага свету, а менавіта вуліцы Міцкевіча, то там збіраемся знесці толькі адзін дом № 13, у якім ужо некалькі гадоў не жывуць людзі. Усе астатнія пабудовы мы не чапаем».
Дом №13 па вуліцы Міцкевіча, які ідзе пад знос
Дом № 31 на вуліцы Віленскай, якi iдзе пад знос
Дом № 6 на вуліцы Зярнова, якi iдзе пад знос
У гарвыканкаме далі зразумець, што на аднаўленне драўляных дамоў у раёне Новага свету і іншых месцах горада проста няма сродкаў. А ў некаторых пабудовах наогул і няма чаго аднаўляць. Нават некаторыя жыхары такіх дамоў аддаюць ужо перавагу кватэрам у новабудоўлях і гатовыя хутчэй пераехаць.
Вось яскравыя прыклады цікавай архітэктуры Новага свету, якія ўжо не першы год стаяць без уладальнікаў. У іх з часам таксама можа «не застацца чаго аднаўляць».
Дом №9 па вуліцы Міцкевіча. Пабудаваны ў пачатку XX стагоддзя. Мае багатае ўпрыгожванне драўлянай разьбой
Дом №7 па вуліцы Міцкевіча. Пабудаваны ў пачатку XX стагоддзя. Мае багатае ўпрыгожванне драўлянай разьбой
Дом №5 па вуліцы Горкага – помнік міжваеннага драўлянага канструктывізму.
«Што рабіць з пустымі драўлянымі пабудовамі? Практыка паказвае, што інвестарам, якія прыходзяць у горад, не патрэбныя такія дамы. Ім танней і выгадней знесці іх і пабудаваць новыя. І пры распрацоўцы праектаў новых будынкаў улічыць архітэктуру старой пабудовы і забудову вуліцы», — дадаў Андрэй Жук.
[irp posts="26 843″ name="Шляхам драўлянага Гродна: канструктывізм, мадэрн і проста атмасферныя хаткі, якія ты мусіш пабачыць"]
Да канца месяца будаўнікі павінны знесці аварыйныя пабудовы на вуліцах Перамогі, Леванабярэжнай, Зярнова, Дзяржынскага і Міцкевіча.
