Моцна панішчаныя дакументы гродзенскага брыгіцкага кляштара ўдалося адрэстаўраваць дзякуючы супрацоўніцтву музеяў Гродна і Беластока.
Дакументы з вялізнага архіву брыгітак, які ахопліваў 16-20 стагоддзі, трапілі ў Гродзенскі гісторыка-археалагічны музей больш за 50 гадоў таму. Іх стан быў жахлівы. Польскія калегі атрымалі грант на захаванне старадаўніх дакументаў.
Пакуль аднавілі каля 300 картак: іх ачысцілі ад цвілі і бруду, апрацавалі адмысловай вадкасцю, важныя страчаныя фрагменты аднавілі.
“У асноўным там утрымліваюцца манастырскія статуты, пропаведзі, малітвы і мноства гаспадарчых дакументаў – дагаворы, вопісы, ацэнка маёмасці. Калі як след заняцца, то можна ўявіць, як жылі людзі ў тыя часы”, – адзначыў у размове з карэспандэнтам БелТА Юрый Кітурка.
Як і ўсе дакументы, якія паступаюць у музей, архіў брыгітак пройдзе навуковую інвентарызацыю. У будучыні з дакументамі змогуць працаваць навукоўцы. Таксама частка архіва ўвойдзе ў вялікую выставу пад назвай “Сакральная спадчына Панямоння”, якую плануюць адкрыць у лістападзе 2018 года.
У музеі захоўваецца толькі часта дакументаў кляштара. Архіў брыгітак дагэтуль лічыцца ў вялікай ступені страчаным.
Дарэчы, гродзенскі і беластоцкі музеі выступаюць партнёрамі ў праекце “Будаўніцтва рэгіянальных цэнтраў па даследаванні і захаванні помнікаў” у праграме трансгранічнага супрацоўніцтва “Польшча-Беларусь-Украіна” на 2014-2020 гады. Кошт праекта каля 1,2 млн еўра.
