У гродзенскай міжраённай СДзЮШАР «Фаварыт» расказалі, на што патрацяць 10 тысяч рублёў, якія ім пералічыць Дар’я Домрачава ў межах праекта “Алімпійскі выбар”.
За гэтыя грошы для школы купяць лыжны інвентар – лыжы, палкі, мацаванні, чаравікі, расказаў дырэктар Гродзенскага абласнога спартыўнага клуба Федэрацыі прафсаюзаў Беларусі Максім Малахоўскі ў праграме Навіны “24 часа” на СТВ.
Калі трэніровачным інвентаром школа забяспечана добра, то з прафесійным спаборніцкім справы ідуць не так паспяхова. Дзякуючы прафесійнаму інвентару спартсмен часта можа выйграць тыя долі секунды, якія прыводзяць яго на п’едэстал.
Пасля сярэбранай перамогі ў гонцы з масавым стартам у Пхёнчхане Дар’я Домрачава абрала менавіта гродзенскі “Фаварыт”, бо яе ўразіў відэаролік, зроблены ў падтрымку беларускіх алімпійцаў выхаванцамі гэтай школы.
https://www.youtube.com/watch?time_continue=152&v=n_RwZj2XPng
Паводле праекта “Алімпійскі выбар” Прэзідэнцкі спартыўны клуб дае права кожнаму чэмпіёну і прызёру Алімпійскіх гульняў выбраць дзіцяча-юнацкую спартыўную школу або іншую спецыялізаваную ўстанову, каб аказаць спонсарскую дапамогу. Сума падтрымкі залежыць ад выніку спартсмена або каманды. У гэтым годзе яна складае — 15 000 беларускіх рублёў за першае месца, 10 000 — за другое, 7 500 — за трэцяе.
