Танцорка прадставіла ў Гродне фотавыставу «палётаў без фоташопу»

Гродзенскі «DanceWeekend» завяршыўся 28 студзеня выставай фотапраекта «Працэс» танцоркі і фатографкі Волі Рабецкай з Мінска. Аматары танцаў і фота маглі знайсці абодва віды мастацтва адначасова ў чорнай зале «Дома 46». Асалоды імпрэзе дадалі дэгустацыя мёду і дыджэйская музыка.

«Ідэя танцавальнага фотапраекта прыйшла спантанна. Здымаючы калег, заўважыла ігру перспектывы, зацікавілася спалучэннем цялеснай формы, адлегласці і ракурсу», - распавяла Вольга. У выніку «вясёлай сумеснай працы» з’явіўся шэраг здымкаў «Працэсу».

Захапленне фотаздымкай стала следствам захаплення танцамі. «Я сама танцорка і падчас здымак мы з рабятамі маглі размаўляць на адной мове. Было проста ставіць ім задачы, я ведала якую „якасць“ цялесную і эмацыйную хачу ад іх атрымаць. Проста шпагат ці „доўгая“ ножка - гэта цікава для фатографаў не-танцораў. Мне хацелася ісці далей і глыбей за тыповую форму».

Героі фотасэта, Вольга Лабоўкіна і Саша Філіпаў магічным чынам «лётаюць» у кадрах, нібы ў бязважкасці. Але ні чараў, ні нават фоташопу на здымках, сцвярджае аўтарка, няма. Проста з другога боку аб’ектыва звыклыя рэчы выглядаюць зусім па-новаму.

«Гэта тонкая і невідавочная праца. Якраз тое, што стварае працэс. А для мяне ў фатаграфіі працэс важнейшы за ўсё — гэта чыстая радасць. Я рэдка думаю пра вынік. Знойдзе ён прымяненне, то добра. А калі не, то дастаткова задавальнення ад працэсу».

Канчаткова вызначацца з выбарам паміж танцам і фота Вольга не плануе. Зразумела, што адначасова адно з другім не бывае. Але знайсць баланс усё ж магчыма.

«Ёсць перыяды, калі ў жыцці больш танцавальнай работы. Тады адчуваю, што нічога не маю дадаць праз фота. Проста супакойваюся і танцую. Потым ізноў адчуваю хвалю, пад’ём — ізноў хочацца здымаць. Тут няма планаў і абавязкаў. Гэта ідзе ад сэрца».

Падарункам ад гаспадароў «Дома 46» стаў танцавальны нумар у стылі «старога добрага джазу» ў выкананні гродзенскіх танцорак.

youtu.be/VOhflUUdkMs

Салодкія ўспаміны пакінула дэгустацыя новых смакаў мёду ад кампаніі «Мядовы шлях». У якасці дадаткаў да мёду выкарыстоўваліся як мясцовыя маліна і чарніцы, так і экзатычныя куркума і зялёны чай.