«Лепш за Лядовы». Сотні чалавек катаюцца на замерзлай лужыне на Дзевятоўцы

Пакуль гарадскія службы рыхтуюць хакейныя каробкі да масавага катання, жыхары Дзевятоўкі знайшлі прымяненне вялікай замерзлай лужыне — яна стала сапраўдным катком.

За мінулыя выхадныя лядовую пляцоўку ў мікрараёне наведала некалькі сотняў чалавек. З раніцы да вечара дарослыя і дзеці катаюцца там на каньках і санках, а таксама гуляюць у хакей і футбол.

«Класнае месца і вялікі плюс, што побач з домам. Пра такі каток можна толькі марыць. Мне тут больш падабаецца чым у Лядовым, — распавядае жыхар Дзевятоўкі Слава. — Тут лёд добры, а ў Лядовым пяць хвілін — і ўжо катацца не вельмі добра. Ды і тут каля дома можна шайбу паганяць з хлопцамі».

Каток з’явіўся ўпершыню

Жыхар Дзевятоўкі Андрэй, які прыйшоў катацца разам са сваім сынам, распавядае, што ў папярэднія гады такога катка на пляцоўцы каля дома не бачыў.

«Гэта звычайнае поле, дзе ўвесь час стаяла вада. Самая сапраўдная лужына. А як далі халады, то яна замерзла і атрымаўся каток, — распавядае Андрэй. — Раней замярзала толькі малая частка. А цяпер, мабыць, у лужыне было больш вады. У нас у ваколіцы няма хакейных каробак, таму гэта адзінае месца, дзе мы катаемся».

Глыбіня лужыны невялікая, каля 15 сантыметраў. Пры мінусовай тэмпературы лёд там хутка замярзае.

У вобласці плануюць заліць 100 каткоў і 50 хакейных каробак

Усяго ў Гродзенскай вобласці ў зімовы перыяд плануецца заліць каля 100 каткоў і 50 хакейных каробак. Для гэтага трэба каб устойліва трымалася тэмпература было ніжэй -5. Пажадана, каб са снегу была «падушка», асабліва там, дзе няма асфальту або спецыяльнага пакрыцця.