Гродзенскі «Нёман» апошні матч 2017 году праводзіў 28 снежня ў Салігорску, дзе сустракаўся з мясцовым «Шахцёрам». Гульню каманда Сяргея Пушкова прайграла. Ужо традыцыйна — у серыі булітаў.
На працягу амаль усёй гульні «Нёман» вёў у лiку, але за 56 секунд да канца асноўнага часу каманда Пушкова дала суперніку зраўняць і перавесці гульню ў авертайм. У дадатковы час супернікі выявіць мацнейшага не змаглі, а ў серыі булітаў, не здолеўшы трапіць у вароты «Шахцёра», гродзенская каманда ў чарговы раз прайграла.
«Шахцёр» — «Нёман» 3:2 (бул.) (0:0, 0:1, 2:1, 0:0, 1:0)
Галы:
20.36 0:1 — Кіслы (Баярчук, Дзярлюк, — бол.)
48.23 1:1 — Бакун
48.45 1:2 — Лісічкін (Дзярлюк, Жыдкіх)
59.04 2:2 — Бакун (Белухiн, Андрушчанка)
65.00 3:2 — Камбовіч (вырашальны кідок)
Пасля 14-матчавай пераможнай серыі ў чэмпіянаце, якую спыніў «Шахцёр» 23 снежня, каманда Сяргея Пушкова прайграе ўжо тры матчы запар, а калі лічыць з фіналам Кубка, то чатыры.
У 2018 год «Нёман» уваходзіць на трэцяй пазіцыі ў турнірнай табліцы і мае 63 ачкі. На другім месцы «Шахцёр» — 68, а на першым «Юнацтва» — 71. Найбліжэйшы пераследнік гродзенцаў «Гомель» — 60 ачкоў.
Першы матч у новым годзе гродзенцы правядуць 11 студзеня ў Маладзечне, дзе сустрэнуцца з мясцовым «Дынама».
