Казюкі ў Гродне нагадалі, што Савецкая плошча раней была Рынкам

Гродзенскія Казюкі сабралі на Савецкай плошчы больш за 150 майстроў. Побач з беларусамі тут прадставілі свае вырабы рамеснікі з Літвы, Польшчы, Украіны і Расіі. Савецкая плошча нібы вярнула сабе гістарычнае прызначэнне і зноў ператварылася ў Рынак. Гандлявалі тут самымі разнастайнымі рэчамі - ад традыцыйных вырабаў з лазы і саломкі да сучасных эка-сувеніраў са шкляных бутэлек.

Спонсар рубрыкі «Горад» — «Пліт-мар» ТАА (аб'яднанне «Група кампаній Белпліта»).

Рабіце мэблю самі і эканомце! Распілоўванне мэблевых матэрыялаў па вашых чарцяжах і велізарны склад матэрыялаў і фурнітуры ад першага імпарцёра і асноўнага пастаўшчыка мэблевых матэрыялаў і фурнітуры ў Гродзенскай вобласці.

Цэлы дзень на плошчы было шматлюдна і весела. Спрыяла добрае надвор’е, канцэртная праграма і шырокі выбар для пакупак.

Майстры заахвочвалі мінакоў рабіць пакупкі, нахвальвалі тавар ды абяцалі «дамовіцца» наконт коштаў. Яно і зразумела. Згодна павер’ю, гандаль на Казюках — гэта своеасаблівы прагноз. Калі пойдзе гандаль падчас свята, то і ўвесь год будзе добра працягвацца.

Сёлета гродзенскія майстры спадзяюцца, што дапаможа ў гандлі не толькі святы Казімір, але і бязвізавыя турысты.

Кірмаш «Казюкі» праходзіць у Гродне ўжо больш за 25 гадоў ў Дзень святога Казіміра, які адзначаецца 4 сакавіка. Святы Казімір — польскі каралевіч і літоўскі княжыч памёр маладым у Гродне і быў прызнаны святым. Ён лічыцца заступнікам Гродзенскай каталіцкай дыяцэзіі, моладзі, майстроў і рамеснікаў.