Першы турысцка-інфармацыйны цэнтр пра бязвізавы Гродна плануецца адкрыць у Літве ў студзені, паведаміў карэспандэнту БЕЛТА начальнік упраўлення спорту і турызму Гродзенскага аблвыканкама Алег Андрэйчык.
Інфармацыйны цэнтр, прысвечаны турыстычным магчымасцям пры наведванні Гродзенскай вобласці з акцэнтам на адпачынак у бязвізавай зоне, будзе створаны сумесна з літоўскімі партнёрамі ў горадзе Бірштонас, з якім наладжаны даўнія сувязі па рэалізацыі праектаў у турыстычнай сферы. Затым экспазіцыі аб Гродзенскай вобласці плануецца адкрыць у падобных цэнтрах Марыямпале, Алітуса і горада Лаздзіяй. У іх ужо вызначаны памяшканні для прэзентацыі патэнцыялу бязвізавага Гродна і ваколіц.
“Стварэнне цэнтраў у Літве вядзецца па своеасаблівым інфармацыйным абмене – у турысцка-інфармацыйным цэнтры ў Гродне ў сваю чаргу частка экспазіцыі будзе прысвечана турыстычнаму патэнцыялу Літвы. Падобная практыка выкарыстоўваецца ў працы з польскімі калегамі – раней у Беластоку з’явіўся цэнтр, прысвечаны турыстычным магчымасцям Гродзенскай вобласці, а ў Гродне – экспазіцыя аб Падляскім ваяводстве, – паведаміў Алег Андрэйчык. – Турысцка-інфармацыйныя цэнтры ствараюцца для якаснага інфармавання патэнцыйных замежных турыстаў аб магчымасцях нашага рэгіёну, аб турыстычных прадуктах і мерапрыемствах, якія праводзяцца тут. У календары мерапрыемстваў Гродзенскай вобласці на 2017 год больш за 300 падзей, якія могуць быць цікавыя розным турыстам”.
У інфацэнтры таксама можна даведацца пра магчымасці ўезду і выезду ў парк “Аўгустоўскі канал”, іншую важную інфармацыю.
