Гродна крыху прыпарушыла снегам. Сіноптыкі абяцаюць, што ў пераднавагоднія дні чакаюцца снег, галалёдзіца і тэмпература ад −3 да −1 °C. У навагоднюю ноч слупкі тэрмометраў могуць апусціцца да −6 °C. Днём будзе каля −1 °C, хоць надвор’е ўскладніць парывісты халодны вецер. Магчыма, пачатак новага 2026 года будзе па-сапраўднаму зімовым. А рэдакцыя Hrodna.life тым часам узгадала, якімі снежнымі бывалі гродзенскія зімы раней.
У архівах гродзенцаў захаваліся фатаграфіі снежных зім мінулых гадоў. Напрыклад, у архіве Мікалая Таранды зафіксаваныя такія зімы канца мінулага стагоддзя.
1980-я. Заснежаныя краявіды Гродна
Гродзенец Міхаіл на сваім YouTube-канале паказваў фатаграфіі Гродна канца 1980-х гадоў. Ёсць там крыху і пра снежныя зімы ў тыя гады. Паглядзіце, як наш горад выглядаў 40 гадоў таму.
Гродзенка Марына падзялілася ў Threads фатаграфіямі зімы 2018 года — тады абласны цэнтр патанаў у снезе. «Бывалі ў Гродне і снежныя зімы», — напісала дзяўчына.
«Калі гэта было… гадоў сто таму», — іранічна заўважыў адзін з каментатараў.
«Вы маеце рацыю, даўно такой снежнай казкі ў нас не было», — пагадзілася Марына, дадаўшы, што і ў зімах без снегу ёсць сваё хараство, але наперадзе яшчэ два месяцы зімы — і, магчыма, снегапады ў Гродне яшчэ будуць.
Люты 2021 года – машыны буксуюць, камунальнікі не спраўляюцца
Сапраўдным выпрабаваннем для горада стала зіма 2021 года. У лютым праз багатыя снегапады ў Гродне фіксавалі аварыі, у розных раёнах узнікалі заторы, буксаваў велікагрузны транспарт. Тады гараджане абураліся працай камунальных службаў.
«Машыны буксуюць і слізгаюць. Дзе ўся тэхніка, якая павінна чысціць дарогі? Я бачыў два трактары, якія проста едуць праз цэнтр. Дарогі няма — ёсць каляіна», — скардзіліся гродзенцы.
У канцы 2021 года снег у Гродне выпаў зноў, але зімовая казка аказалася нядоўгай. Тым не менш, фатограф Сяргей Марозаў паспеў зафіксаваць заснежаныя пейзажы горада.
2023 год – прыгожа, але нядоўга
Снега перад навагоднімі святамі чакалі і ў 2023 годзе. Ён выпаў у пачатку снежня, аднак беласнежная карціна хутка растала, і Новы 2024 год гродзенцы сустрэлі ўжо без снегу.
Пачатак 2025 з доўгачаканым снегам
Сёлета снег прыйшоў з невялікім спазненнем — 4 студзеня. Затое гродзенцы паспелі пакатацца з горак і адчуць тую самую зімовую, амаль казачную атмасферу ўжо пасля навагодніх святаў.
Магчыма, і канец года, і навагодняя ноч 2025–2026 таксама будуць снежнымі, як гэта было, напрыклад, у 2010 годзе.
