Я Ірына Новік, рэдактарка спецпраектаў Hrodna.life. Пішу гэты пост, каб папрасіць у вас дапамогі.

Цяпер нашы журналісты — насамрэч журналісткі. Дзяўчынкі прыкладна таго ж узросту, што і мае дочкі. Кожны раз, калі яны ідуць на рэдакцыйнае заданне, у мяне сціскаецца сэрца. За месяц ніхто з іх не спытаў, калі можна ўзяць адпачынак, ці будзе кампенсацыя за працоўныя выхадныя і як аплацяць перапрацоўку.

Гэтыя пытанні задаю сабе я. Таму прашу вас аб падтрымцы. Цяпер мой галоўны спецпраект — захаваць каманду і працягнуць працу рэдакцыі. Без вас нам будзе вельмі цяжка гэта зрабіць.


Чытай яшчэ: «Я быў пазначаным». Руслан Кулевіч распавёў ўсё пра затрыманне, суд і цкаванне пасля «сутак»


Летам 2020 года я пісала аб дабрачыннасці, падарожжах і здаровым ладзе жыцця. Такія партнёрскія і рэкламныя праекты дапамагаюць зарабіць грошы для тых, хто піша навіны і некамерцыйныя гісторыі. Цяпер усе праекты спыненыя.

Мы ведаем — вам, нашым чытачам, важней іншая інфармацыя. Пра мірныя пратэсты. Пра тое, як фальсіфікавалі выбары, што адбываецца ў ізалятары часовага ўтрымання і ў турме. Пра людзей, якія сталі героямі, і пра тых, хто збіваў гараджан на вуліцах.

Чытай яшчэ:

Пайшоў другі месяц, як рэдакцыя Hrodna.life працуе без выхадных і не лічачыся з працоўным часам. Мы забыліся, што такое «абед па раскладзе». Нашы блізкія амаль не бачаць нас дома, яны «ўсё разумеюць». Забастоўка незалежных журналістаў - гэта застацца пасля працоўнага дня і пісаць далей. Выслухоўваць людзей. Тэлефанаваць у прэс-службы. Шукаць дакументы і правяраць факты.


Чытай яшчэ: Міліцыя прыйшла ў рэдакцыю Hrodna.life, таму што заўважыла бел-чырвона-белы сцяг у акне


Калі вы лічыце нашу працу важнай, калі вы хочаце, каб Hrodna.life існаваў — падтрымайце нас.

Мы рады кожнай дапамозе, але найбольш важная для нас — падпіска на краўдфандынг платформе «Талака». Тут можна аформіць штомесячныя плацяжы, каб рэгулярна падтрымліваць рэдакцыю.

З вашай дапамогай мы працягнем працаваць і расказваць тое, пра што маўчаць іншыя.

Рэдактарка спецпраектаў, рэпарцёрка, фатографка і відэографка. У журналістыцы з 2015 года. Удзельнічала ў распрацоўцы канцэпцыі рэбрэндынгу выдання «Твой стыль» і стварэнні «Hrodna.life». Паводле адукацыі Ірына інжынер-механік, таму не цураецца тэхнічна-складаных фарматаў.

Найчасцей піша сацыяльныя рэпартажы. Любімая справа — вынаходзіць ровар і ставіць амбітныя мэты для ўсіх, хто не паспеў схавацца.

Матэрыялы Ірыны Новік былі адзначаны дыпломамі многіх конкурсаў.