У канцы лета ў Гродне з’явілася ў продажы першая гарадзенская кава, якую прадукуе малады прадпрымальнік Вадзім. Ён хацеў зрабіць гораду асаблівы падарунак да 888-годдзя, а таксама развеяць міф пра тое, што ў Беларусі не ўмеюць рабіць кавы.

Новы прадукт назвалі «Horodnia 1128». У назве Вадзім не сумняваўся, бо любіць свой горад, жыве і працуе ў ім. На ўпакоўцы адлюстравалі абласны драматычны тэатр, паколькі з ім у большасці гарадзенцаў і асацыюецца горад.

«Працуем з пачатку гэтага года, спецыялізуемся на продажах збожжавай кавы і ўстаноўцы аўтаматычных кавамашын. Маладой фірме цяжка напрацоўваць кліенцкую базу ва ўмовах жорсткай канкурэнцыі на беларускім рынку кавы. Таму да нас прыйшла ідэя стварыць унікальны прадукт, сваю гандлёвую марку кавы, якая б не толькі вылучыла нас сярод канкурэнтаў, але і забяспечыла гарадзенцаў якасным прадуктам. У выніку доўгай аналітычнай работы сумесна з беларускім вытворцам мы распрацавалі адмысловы купаж кавы. Хочацца развеяць міф пра тое, што ў Беларусі не ўмеюць рабіць кавы», — кажа Вадзiм.

Пакуль што прадукт не вельмі моцна запатрабаваны на гарадзенскім рынку: яго прадаюць праз інтэрнэт і ў дзвюх крамах — «Баторыя» і «Сонечны».

coffee2

Новы прадукт заўсёды цяжка прасоўваць, асабліва беларускую каву, лічыць Вадзім. Маўляў, калі спажывец бачыць на ўпакоўцы надпіс «выраблена ў Беларусі», то да гэтага прадукту будзе ставіцца з недаверам і здзіўленнем — «кава ж у нас не расце». Але тое самае можна сказаць і пра італьянскую, нямецкую ці галандскую каву, тлумачыць Вадзім.

«У гэтых краінах проста навучыліся абсмажваць зерне на найноўшым абсталяванні, кантраляваць усе стадыі вытворчасці і сачыць за якасцю прадукцыі», — кажа хлопец.

Продаж гарадзенскай кавы пакрысе расце. «Мы пастаянна расказваем нашым патэнцыйным пакупнікам аб вытворчасці гарадзенскай кавы, праводзім дэгустацыі, невялікія рэкламныя акцыі - усё, што дапаможа спажыўцу даведацца пра нашую каву больш, пакаштаваць яе і, магчыма, зрабіць выбар на карысць «Horodnia 1128».

Саму каву вырабляюць у Мінску, дзе фірма займаецца памолам зерня і сартаваннем.

coffee3

coffee4