Многія гродзенцы ведаюць Алега Сіднева як паспяховага мотаспартсмена. Аднойчы Алег стаў расчышчаць свой гараж і … не змог выкінуць старыя запчасткі, даўшы ім другое жыццё!
— «Жаданне рабіць нешта незвычайнае са звычайных запчастак з’явілася ў канцы зімы 2016 года, калі прыйшоў час вызваліць гараж. Пакуль выграбаў запчасткі, у галаве адразу сталі складвацца вобразы. Наогул, з тэхнікай я „на ты“. Пастаянна рамантаваў матацыклы і ўжо 34 гады працую зваршчыкам. Таму паспрабаваў зрабіць некалькі мадэляў матацыклаў - і ўсё атрымалася. Вырабы ацанілі сябры, творчасць нават заўважылі ў асацыяцыі матацыклістаў», — расказвае AutoGrodno.by Алег.
Калі летам у Літве праходзіў этап чэмпіянату свету па мотакросе і мадэлі матацыклаў, зробленыя Алегам, падарылі чэмпіёну 2017 года Эцьен Ваху, а затым і 10-кратнаму чэмпіёну свету Даніэлю Вілемсену, то ў Алега Сіднева яшчэ больш пацягнула да творчасці.
— «Гэта быў знак, што трэба працягваць«, — успамінае Алег.
У майстэрні Алега аказалася не так ужо і шмат вырабаў, многія з іх ужо раздарыў. З нядаўняга можна асабліва адзначыць настольную лямпу з поршняў і корпуса счаплення. Яна круціцца ў розныя бакі і можа падсвятляць прастору на стале пад розным вуглом.
— «Для працы трэба зусім не шмат інструментаў. Ціскі, мянташка, балгарка, зварка і трохі фантазіі«, — усміхаецца Алег, — «часцей за ўсё выкарыстоўваю зварку аргонам, ёй атрымліваецца акуратней».
У ход пайшлі ўжо амаль усе свабодныя запчасткі. Цяпер Алег усё часцей звяртаецца да сваіх сяброў-мотаспартсменаў: у кожнага з іх цэлыя скрыні з запчасткамі.
— «Сябры сталі прасіць зрабіць тэматычныя вырабы і затым іх перадорваюць сваім сябрам. Вось у мяне ўжо гатовыя фігуркі хакеіста, рыбака і падарунак для закаханай пары«, — паказвае вырабы Алег.
Дарэчы, як толькі мы дамовіліся пра фотасесію, Алег прыдумаў і сабраў фігурку фатографа. Дзякуем! Але часцей у руках Алега нараджаюцца мініяцюрныя матацыклы, з якімі звязана ўсё яго жыццё.
Алег Сіднеў займаўся мотаспортам яшчэ пры Савецкім Саюзе. Але пасля яго развалу пахіснулася і дысцыпліна. Так, у хобі Алега быў вялікі перапынак. Вярнуўся гарадзенец ў мотаспорт толькі ў 2007 годзе, ва ўзросце 44 гадоў. У першы ж год вяртання ён стаў чэмпіёнам Беларусі ў спаборніцтвах на матацыкле з каляскай. З тых часоў яго галоўным партнёрам быў Сяргей Дзягцераў, з якім яны сталі неаднаразовымі чэмпіёнамі краіны.
Самая любімая фігурка, якая назаўжды застанецца пры Алегу, прысвечана яго партнёру Сяргею і іх матацыклу.
Цяпер Алег працягвае ўдзельнічаць у мотаболе, удзельнічае ў гонках на матацыклах з каляскай у класе «ветэраны» і неаднаразова станавіўся прызёрам чэмпіянату свету.
— Ці ёсць у вас не спартыўны матацыкл, напрыклад, чопер?
— «Раней я ўвесь час ездзіў на гарадскім матацыкле. Але зараз аддаў перавагу аўтамабілю для штодзённага выкарыстання. Пры гэтым вельмі хачу набыць Харлей і пачаць на ім падарожнічаць. Але часу на гэта няма, увесь вольны час пасля працы зараз сыходзіць на пабудову мадэлькаў, а вольныя выхадныя дні займае спорт».
Жадаем Алегу натхнення ў творчасці і новых перамог у мотаспорце!