Дзеўку — не цісні, хлопцу — не адмаўляй. Напярэдадні першай у Беларусі міжнароднай ночы традыцыйных танцаў, якая адбудзецца 11 лістапада ў сядзібе «Райскі куток», аматары расказалі, як стаць зоркамі танцпляца на вечарыне.
На танцы варта апранацца ў зручную вопратку, але прыстойна, нават па-святочнаму. Шорты і майкі — гэта нядобра. Традыцыйны строй неабавязковы, часам нават лішні. Пажадана, каб жанчыны былі ў спадніцах, а хлопцы ў ботах. Агулам абутак і адзенне зручныя, па мінімуму сінтэтыкі.
У арыгінале кавалеры запрашаюць дам, але на практыцы бывае па-рознаму. Калі дзяўчыне не хапіла хлопца, то ў пару могуць стаць дзве дзяўчыны. Гэта было натуральнай справай на нашых землях, асабліва пасля вайны, калі мужчын на вёсках засталося няшмат.
Дзеўка не можа адмовіць, калі яе запрашаюць танчыць. Раней за такое «з маршам» выправоджвалі з хаты, дзе ладзілася вечарына.
Не трэба баяцца далучацца да танцаў, якія не ведаш. Можна спрабаваць. Але не варта таксама кідацца ў невядомыя танцы адразу. Паназірай, зразумей, далучайся. Нельга танчыць свае ўласныя фігуры ў кругавым або лінейным танцы: навічкі могуць назіраць і вучыцца ў працэсе.
У пары дыстанцыю кантралюе дзяўчына. Калі хлопец надта цісне, то яна можа болей адштурхнуцца. Аднак у любым выпадку важна, каб хлопец трохі прыхіляў дзяўчыну да сябе, а яна адхілялася. Узнікае напружанне, якое пры кручэнні пераўтвараецца ў цэнтрабежную сілу і дапамагае круціцца.
Хлопец кладзе правую руку на лапатку дзяўчыне. Калі ён значна вышэй, то можна на плячо. Танцоры часцей знаходзяцца паралельна адзін да аднаго і досыць моцна трымаюць партнёра. Так рукі будуць менш стамляцца. У фігуры «лодачка» танцуюць разам: хлопец і дзяўчына моцна і зручна адбымаюцца, але ў межах разумнага. У польцы, вальсе, факстроце стаяць не тварам у твар, а насупраць пляча адно аднаго. Тады правыя ногі стаяць паміж нагамі партнёра.
Важна, каб хлопец кіраваў, упэўнена паказваў свой намер, але не ламаў рукі. Дзяўчыне важна слухаць хлопца, адчуваць і рэагаваць на яго намер. Хлопец — вядучы, дзяўчына — вядомая. У хуткім танцы хлопец прыкрывае партнёрку ад сутыкненняў. Выбачаецца, калі сутыкаюцца з іншай парай.
Больш знаёмыя, сямейныя пары могуць глядзець у вочы. Незнаёмым прапануюць глядзець адзін аднаму ў плячо, ды пераферычным зрокам наўкола.
У традыцыйных танцах менш артыстычнасці ў параўнанні са сцэнічнымі. Іх танчылі пасля цяжкай гаспадарчай працы, таму крокі, скокі, павароты мінімальныя. Іх не скачуць на дыбачках, а ступаюць поўнай ступнёй. Калені прысогнутыя і пружыняць. Не трэба напружвацца і мітусіцца. Лепш слухаць музыку і ступаць у такт. Калі не прапускаць крокі, то не ўзнікне пытанне, з якой нагі пачынаць, заўжды са зручнай.
Калі пасля танца партнёры не плануюць танчыць разам далей, то хлопец праваджае дзяўчыну на месца, адкуль яе запрашаў.
Галоўны сакрэт — дайсці, даехаць, даплысці, дапаўзці і трапіць на ноч танцаў. А там ужо справа сама закруціцца. Не магчыма будзе ўседзець!
Парады давалі Аляксей Крукоўскі і Цімох Акудовіч (Мінск), Воля Трубач і Ганна Клімашэўская (Маладзечна), Андрэй Бароўскі (Гродна), Яўген Даўкша (Вільня).
Лета скончылася, адпачынкі - таксама. Прыйшоў час задумацца, дзе паесці падчас перапынку на працы. Hrodna.life…
Аляксандры Ханевіч з Гродна 72 гады і яе часта прадстаўляюць як пенсіянерку-змагарку, эмігрантку, блогерку і…
Ева — маладая персона з Менска, у якой у вельмі маладым узросце пачалі праяўляцца сімптомы…
Канфлікт з-за смецця разгарнуўся ў канцы жніўня вакол шаўрмічнай «Shaw-Books» на вуліцы Савецкай. Гродзенцы скардзіліся…
Беларусы крытыкуюць лідскі "ХарчФэст" у інтэрнэце, але здаецца, ён усё ж збярэ нямала гледачоў. У…
Як змянілася жыццё пасля таго, як яна даведалася пра ВІЧ-статус, як будавала адносіны і нараджала дзяцей,…