Паездка ў Латвію на канцэрт Rammstein, якая сарвалася два гады таму, літаральна падарыла Гродна новы музычны гурт. Экс-прадавец музычных інструментаў, яго брат-інжынер, два айцішнікі і манцёр чыгуначных шляхоў з веданнем нямецкай рыхтуюць трыб’ют папулярнага гурта з Нямеччыны. Першы іх канцэрт пройдзе 1 траўня ў бары «RockStar». Карэспандэнтка Hrodna.life запісала незвычайную гісторыю гурта.

Як падтрымаць рэдакцыю Hrodna.life?


Каб рэдакцыя магла ўтрымаць штат журналістаў і офіс, мы просім вас пералічыць нам невялікую суму грошай.

Рэдакцыя Hrodna.life напісала на афіцыйную старонку Rammstein, што гродзенцы рыхтуюць трыб’ют-канцэрт. Адказаў Ціль Ліндэман!

Апошнія чатыры гады музыкант Алег (Варона) Варанцоў працаваў у краме музычных інструментаў «GreenStar». Звольніўся праз падзеі жніўня 2020 года. «У цэнтры складана стала працаваць. Адзін раз думаў, што да [рэпетыцыйнай] кропкі не дайду, якая ў двух кроках ад працы. Павяжуць і паеду я з гітарай не туды, куды трэба». Цяпер Алег працуе бармэнам у «Бухте».

Дзяцінства прайшло, мара засталася

У 2019 годзе Алег збіраўся на канцэрт Rammstein у Рыгу. Ён ужо купіў квіткі, але паездка сарвалася праз сварку з дзяўчынай. «Адзін квіток прадаў знаёмай, другі аддаў брату, у яго была віза. Пасля канцэрту сядзеў, падбіраў і пераігрываў Rammstein», — распавёў музыка.

Rammstein і коцікі. Два браты, два айцішнікі і чыгуначнік адыграюць у Гродне трыб'ют улюбёнага гурта
Алег (Варона) Варанцоў не трапіў на канцэрт Rammstein. Таму сабраў гурт і грае іх музыку ў Гродне

Брат Алега, Павел Варанцоў, інжынер-электрык ў сетцы крамаў, таксама фанат Rammstein. Граць на гітары пачаў у 12 гадоў. Першая песня, якую ён падабраў, была з рэпертуару Rammstein.

Rammstein і коцікі. Два браты, два айцішнікі і чыгуначнік адыграюць у Гродне трыб'ют улюбёнага гурта
Павел Варанцоў - брат Алега. У групе — сола-гітарыст. Першая песня, якую ён падабраў на гітары, была з рэпертуару Rammstein

Rammstein — метал-гурт з Нямеччыны. Заснаваны ў студзені 1994 года ў Берліне. Для гурта характэрныя спецыфічныя рытмы, эпатажныя тэксты, выкарыстанне піратэхнікі на выступах. У гурце граюць вакаліст, аўтар тэкстаў і фронтмэн Ціль Ліндэман, лід-гітарыст Рыхард Круспэ, бубнач Крыстаф Шнайдэр, рытм-гітарыст Паўль Ландэрс, клавішнік Крысціян Лорэнц, бас-гітарыст Олівер Рыдэль. Склад гурта ні разу не мяняўся. Продажы альбомаў гурта — каля 20 мільёнаў копій.

Rammstein і коцікі. Два браты, два айцішнікі і чыгуначнік адыграюць у Гродне трыб'ют улюбёнага гурта
Rammstein выконваюць песню «Engel» у Мэдысан-сквер-гарден 11 снежня 2010. Фота: KinkESizemore, CC BY-SA 3.0, via Wikimedia Commons

Браты сталі рэпетаваць удвох, гралі пад запісы, а калі стала атрымлівацца, вырашылі сабраць калектыў і зрабіць трыб’ют. Яны з дзяцінства марылі хоць раз даць канцэрт па-сапраўднаму. Цяпер прыйшоў час увасобіць мару.

«Трыб'ют» — ад ангельскага tribute, што значыць «даніна павагі». Гэта канцэрт, прысвечаны творчасці музыканта або гурта. На трыб’ютах іх песні гучаць у выкананні іншых музыкаў.

Каманду музыкаў набралі ў бары

Спачатку Алег збіраўся спяваць сам. Але зразумеў, што на нямецкай гэта складана. Браты вырашылі, што Паша будзе граць на сола-гітары, а Алег на бас-гітары. Вакаліста і бубнача будуць шукаць. Патрэбныя выканаўцы знайшліся ў бары, дзе цяпер Алег працуе, а Паша часта заходзіць вечарамі. Гэта месца, па словах Алега, «усіх аб’яднала».

Дзіма-бубнач: «З дзяцінства люблю гэты гурт»

Першым знайшлі барабаншчыка. Ім стаў веб-дызайнер Дзмітрый Глушчанка. «Ён выявіўся дзікім фанатам Рамштайна — пяць разоў быў канцэртах у Еўропе», — распавёў Варона.

Rammstein і коцікі. Два браты, два айцішнікі і чыгуначнік адыграюць у Гродне трыб'ют улюбёнага гурта
Дзіма навучыўся граць на барабанах ў школе, але дарослым да прыходу ў гурт пра гэта не ўспамінаў

Дзіма пачаў граць на барабанах ў дзясятым класе, вучыўся ў музычнай школе і нават браў індывідуальныя ўрокі. Але пасля школы да прыходу ў гурт больш не садзіўся за барабаны. «За восем месяцаў ён стаў вельмі нават нядрэнна граць», — распавёў Алег.

«Бухалі ў бары, падыходзіць Варона і кажа: „Хачу граць Rammstein“. Сказаў, што я бубнач і з дзяцінства люблю гэты гурт. Абмяняліся тэлефонамі», — успамінае Глушчанка знаёмства.

Вадзім-вакаліст: «Даў у морду за Rammstein»

Вакаліста Вадзіма Крываносава сустрэлі ў тым жа бары. «Ён афігенна размаўляе па-нямецку, практычна няма акцэнту, — кажа Варона. — Вечна сядзеў і вырабляўся на нямецкай. Падумаў, хоць бы Rammstein слухаў. Пашанцавала. Вадзім аказаўся фанатам. Усё сышлося», — распавёў Варона.

Вадим Кривоносов фанат группы Rammstein и немецкого языка. Раньше петь не пробовал
Вадзім Крываносаў - фанат гурта Rammstein і нямецкай мовы. Раней спяваць не спрабаваў

Да прыходу ў гурт Вадзім ніколі не спяваў. Ён працуе манцёрам шляхоў на чыгунцы. Нямецкую мову вывучыў сам, яшчэ дзіцем.

«У бабулі зала была агромністая, клаўся на падлогу, адкрываў слоўнік і вучыў словы, правілы чытання і граматыку трошкі», — успамінае Вадзім.

Ад прапановы стаць салістам гурта ён доўга адмаўляўся. Першым аргументам «за» было тое, што спяваць трэба на нямецкай. Другім — што гэта Rammstein.

«Я ў дзяцінстве па ім фанацеў моцна, напэўна праз гэта згадзіўся. Нават бойку ў школе зладзіў адзін раз. Аднакласнік сказаў, што „гаўно твой Rammstein“, ну я і набіў яму морду», — распавёў Hrodna.life Вадзім Крываносаў.

Дзіма-гітарыст: прыйшоў за кампанію

Другім гітарыстам запрасілі Дзмітрыя Мінгіновіча. Цяпер ён працуе ў IT-кампаніі. Музычнай адукацыі ў яго няма. Гітару асвоіў сам, яшчэ школьнікам. Спачатку Зміцер прыходзіў на рэпетыцыі за кампанію і часам спрабаваў падыгрываць.

Rammstein і коцікі. Два браты, два айцішнікі і чыгуначнік адыграюць у Гродне трыб'ют улюбёнага гурта
Дзмітрый Мінгіновіч — другі гітарыст гурта. Фота з асабістага архіва

«Калі разам усё зыгралі, зразумелі, што аб’ёмней і цікавей гучыць з другой гітарай», — кажа Дзіма.

Пажаданне ад Ціля

Першы выхад на публіку рыхтавалі да байк-фесту. Каб выступіць там, дастаткова проста падаць заяўку. Але ў 2021 годзе фэст адмянілі. Каб не адкладаць канцэрт надоўга, сталі шукаць іншыя магчымасці.

Атрымалася дамовіцца з барам «RockStar». Музыкі разлічваюць, што на канцэрт прыйдуць не менш за 50 чалавек. «У Гродне многія слухаюць Rammstein. Кантынгент будзе дастаткова разнамасны. Я ведаю шмат народу, які ездзіць у Еўропу на канцэрты гурта, гэта ўжо аб нечым кажа. Думаю, ім будзе цікава, прыйдуць прачэкаць, як зробім гэта мы», — распавёў Варона.

Rammstein і коцікі. Два браты, два айцішнікі і чыгуначнік адыграюць у Гродне трыб'ют улюбёнага гурта
«Прабачце, пакуль не атрымаецца выканаць вашыя просьбы [аб аўтографах], але я жадаю музыкам-пачаткоўцам поспеху. Ад усяго сэрца хачу, каб іх кар’ера склалася найлепшым чынам. Больш святла, больш натхнення», — пажадаў Ціль Ліндэман гродзенскім музыкам-аматарам

Кошт квіткоў на трыб’ют будзе сімвалічным.

Пасля гродзенскага дэбюту музыкі плануюць выступіць у адным з мінскіх клубаў. «Адным канцэртам скончыць не хочацца, — кажа Павел Варанцоў. — Склад добры, трэба працягваць».


У сваёй працы Hrodna.life арыентуецца перадусім на супольнасць чытачоў. У цяжкую хвіліну мы спадзяемся на іх падтрымку.

Каб утрымаць штат журналістаў і офіс, мы просім вас пералічыць нам невялікую суму грошай.

З вашай дапамогай мы працягнем працаваць і расказваць тое, пра што маўчаць іншыя.