Вядомага гродзенскага ўласніка гатэляў Станіслава Сямашку і ягоную жонку Наталлю падазраюць у тым, што яны знішчылі дэкор для свайго гатэля, за які не заплацілі вытворцу. Калі сужэнцаў прызнаюць вінаватымі, ім пагражае да дзесяці гадоў калоніі, піша «Радыё С*****а».
Першы беларускі прадпрымальнік супраць маладога майстра
Новы апарт-гатэль, праз які пачаўся канфлікт, знаходзіцца ў цэнтры гораду, насупраць турмы, за некалькі крокаў ад Савецкай плошчы. Будынку болей за 130 гадоў. Першапачаткова там месцілася габрэйская школа і малітоўны дом. Апошнія гады будынак стаяў закінуты. Сёлета 7 лістапада яго ўрачыста адкрылі пасля рэканструкцыі.
«Аб'ект будзе вельмі вясёленькі». Сямашка адкрыў у цэнтры Гродна свой палац
Уласніку новых апартаментаў Станіславу Сямашку 66 гадоў, паходзіць са Шчучына. У Гродне ён перш за ўсё вядомы гатэлем, які месціцца ля аўтавакзала і называецца ягоным прозвішчам. Акрамя гатэльнага бізнесу, мае свае праектную кампанію.
Бізнесовец называе сябе першым беларускім прадпрымальнікам, бо атрымаў рэгістрацыю пад № 1 адразу пасля пачатку «перабудовы». У 2009−2012 гадах ён узначальваў праўладны Саюз палякаў у Беларусі.
З другога боку крымінальнай справы — 35-гадовы прадпрымальнік з Фаніпалю Георгій Прыходзька, які зрабіў аздобу для апарт-гатэлю. Ён лічыцца пацярпелым.
Выконваў работы без пісьмовай дамовы
Гісторыя пачалася мінулым летам. Прыходзьку замовілі вырабіць аздабленне вокнаў і сценаў для фасадаў новага Сямашкавага гатэлю. Дэкор меўся быць багатым, з пілястрамі і завітушкамі.
«У „ГарБудзе“ паўгода абяцалі, што падпішуць дамову, але падманулі. Забралі дзве накладныя, не падпісалі і потым іх знішчылі», — адказвае Прыходзька на пытанне, чаму пагадзіўся працаваць на падставе вуснай дамовы. Да таго ж, кажа ён, вусныя дамовы практыкуюцца ў сферы будоўлі.
Вытворца мяркуе, што яго знайшлі ажно ў Фаніпалі, бо дэкор такой складанасці ў Беларусі мала хто робіць. Матэрыял вырабаў — пенапласт.
Дэкор ацанілі ў 23 тысячы рублёў
Дамовіліся на аб’ём аздаблення коштам звыш 23 тысяч рублёў.
Сямашка праз суд вярнуў сабе аванс
Уласнік гатэля патлумачыў у заяве, што нібыта памылкова пералічыў грошы прадпрымальніку. Ён адзначыў, што Прыходзька не ўзгадніў з ім шэраг умоваў (краіну вырабу тавару, матэрыял, памеры, выгляд элементаў). Паколькі прадпрымальнік доўга не вырашаў гэтыя пытанні, Сямашка адмовіўся заключаць з ім дамову.
Так бізнесовец праз суд вярнуў сабе выплачаныя раней амаль 14 тысяч рублёў і адсотак у 500 рублёў за тое, што іпэшнік незаконна карыстаўся пэўны час ягонымі грашыма.
Прыходзька мае шматдзетную сям’ю, таму папрасіў суд дазволу выплачваць у растэрміноўку, аднак ягонай просьбы не задаволілі.
Кавалкі дэкору знайшлі на лецішчы пад Шчучынам
Пасля суду прадпрымальнік паспрабаваў вярнуць сабе хаця б адгружаны дэкор, бо спадзяваўся прадаць яго іншаму кліенту. Аднак і гэта аказалася нерэальным, ніхто яго Прыходзьку не аддаў.
«Мне паказалі гэтыя аскепкі. Я пазнаў. Гэта мой дэкор. Я бачыў яго ў мяшках», — кажа Георгій.
Следчы камітэт завёў крымінальную справу ў дачыненні Станіслава і Наталлі Сямашак за наўмыснае знішчэнне або пашкоджанне маёмасці ў буйным памеры (частка 2 артыкулу 218 Крымінальнага кодэксу Беларусі). Іх падазраюць у знішчэнні 975 элементаў дэкору.
Майстар: «Я нікога не хачу пасадзіць»
Цяпер з кавалкаў аднавіць дэкор немагчыма. Прыходзька хоча, каб яму кампенсавалі страчаныя вырабы. «Мне больш нічога не трэба. Я нікога не хачу пасадзіць. На гэтыя грошы можна набыць нармальную машыну», — тлумачыць Георгій.
Прадпрымальнік не мае прэтэнзій да Сямашак. Ён мяркуе, што кампенсаваць яму шкоду абавязаны «ГарБуд» у асобе Вячаслава Радзюкевіча, з якім ён вёў перамовы. «З Сямашкам я не дамаўляўся. Нас «ГарБуд» сутыкнуў з ім ілбамі. Больш у мяне пытанняў хутчэй да «ГарБуду», — кажа Прыходзька.
Крыніца, якая ведае дэталі сітуацыі, але не хоча сябе называць, расказала С******е ўласную версію канфлікту. Паводле яе, Станіслаў Сямашка мог узгадніць з уладамі адзін варыянт дэкору гатэлю, аднак насамрэч хацеў аздобіць яго больш багата. Таму распрацаваў другі варыянт і менавіта яго замаўляў прадпрымальніку з-пад Мінску. Відаць, бізнесовец спадзяваўся ўнесці змены ва ўжо зацверджаны праект, аднак не атрымалася.
Сямашка: дэкору не было, заплацілі памылкова
Станіслаў Сямашка абвяргае ўдзел свой і сваёй жонкі ў знішчэнні дэкору. Ён накіраваў адпаведныя звароты ў Следчы камітэт, пракуратуру, аблвыканкам.
У звароце ён адзначае, што не замаўляў і не прымаў дэкору ні ад Георгія Прыходзькі, ні ад «ГарБуду». Больш за тое, не меў гаспадарчых дачыненняў з Прыходзькам і нават не бачыўся з ім, пакуль не завялі крымінальнай справы. Тое, што Сямашка пералічыў Прыходзьку аванс, ягоны юрысконсульт Ігар Абрамовіч тлумачыць памылкай.
Следчыя, заводзячы крымінальную справу, не патлумачылі матыву і спосабу ўчынення злачынства. Гэта Сямашка таксама лічыць парушэннем.
«Той хлам абсалютна не цікавы Станіславу Людвігавічу. У яго дастаткова актываў і даходаў. Яны нармальныя людзі, не псіхічна хворыя. Навошта ім нешта знішчаць? Яны людзі вельмі спакойныя, ціхія», — абураецца Ігар Абрамовіч.
Наогул уласнік гатэляў адмаўляе, што дэкор існаваў. Ён называе знойдзеныя парэшткі будаўнічым смеццем, абломкамі гіпсу і пенапласту.
«Дэкор быў адгружаны насыпам, яго пры прыёме не пералічылі, не ўзважылі, накладная была падпісана з парушэннямі: супрацоўнікам „ГарБуду“, які не меў на гэта права, а подпіс пастаўлены на адваротным баку накладной», — адзначае Ігар Абрамовіч.
Тое, што рэшткі дэкору знайшлі на лецішчы пад Шчучынам, бізнесовец тлумачыць так: вывез будаўнічае смецце толькі пасьля таго, як «ГарБуд» адмовіўся зрабіць гэта, а дзяржаўныя інстанцыі выдалі прадпісанне тэрмінова прыбраць яго.
Сямашка мяркуе, што справа заведзеная і расследуецца незаконна і перадузята, а таму мусіць быць спыненая.
Затрымлівалі ноччу, выбівалі дзверы
Да таго ж у сваёй заяве ён звярнуў увагу на парушэнні сваіх правоў праваахоўнікамі.
Як расказаў Ігар Абрамовіч, Станіслава Сямашку затрымалі ўвечары пасля таго, як ён адпачываў у лазні, выпіў алкаголь і прыняў снатворнае. Да сястры ягонай жонкі Тамары міліцыянты таксама прыйшлі ноччу і выбівалі нагамі мэталёвыя дзверы ў хату, незаконна зрабілі ператрус і затрымалі для допыту. Швэйцара гатэлю Віталя Паўлоўскага, які сведчыў супраць Сямашкі (да гэтага пратрымалі ў пастарунку 11 гадзін, хоць допыт доўжыўся 35 хвілін). Абрамовіч настойвае, што такія паказаньні нельга ўлічваць, бо яны былі ўзятыя пад ціскам. Затрыманні адбываліся ў сярэдзіне кастрычніка.
З Сямашкі ўзятая падпіска аб нявыездзе. Арыштаваныя ягоныя банкаўскія рахункі і дом, кошт якога ў 25 разоў, паводле яго, перавышае шкоду ў справе.
«Жонка вядомага бізнэсоўца плача. Кажа: „За што мне ў жыцці такое? Я ніколі нічога не пашкодзіла, не прысвоіла. Чаму такая несправядлівасць?“», — пераказвае стан Наталлі Сямашкі юрысконсульт.
Следчы камітэт сітуацыю не растлумачыў
У Следчым камітэце атрымаць інфармацыю аб справе не атрымалася.
«Я не валодаю інфармацыяй у пытанні, якое вас цікавіць», — пракаментаваў афіцыйны прадстаўнік упраўлення Следчага камітэту Гродзенскай вобласці Сяргей Шаршаневіч.
Намеснік дырэктара фірмы «ГарБуд» Вячаслаў Радзюкевіч таксама адмовіўся ад каментару.
Фантан і вазоны на тэрыторыі не адпавядаюць праекту
Дарэчы, як стала вядома С******е, фігуркі, якімі Сямашка ўпрыгожыў тэрыторыю вакол новага гатэлю (фантаны, вазоны), не былі ўзгодненыя праектам. Чыноўнікі гарвыканкаму вынеслі яму ў сувязі з гэтым прадпісанне.
На пытанне, што пагражае бізнесоўцу, калі ён не прыбярэ гэтыя ўпрыгожанні, супрацоўніца гарвыканкаму адказала, што нічога.
«Там стаіць бутафорыя: каб гэта пераставіць, нічога не патрабуецца. Нам было растлумачана, што ў чалавека адкрыццё. Ён зрабіў, як лепш. Ведаеце, як вешаюць на фасад „Мы адкрыліся“. Так і ў гэтым выпадку», — патлумачыла Вольга Барэйка.
Несанкцыявана стварыў могілкі?
Станіслаў Сямашка ўжо быў у цэнтры скандальнай гісторыі ў пачатку 2000-х. Яму прыпісвалі несанкцыяванае стварэнне мэмарыяльных могілак нямецкіх жаўнераў часоў Другой сусветнай вайны ў родным Шчучыне і іншых месцах Гродзеншычы. Пра гэта неаднаразова пісала газета «Советская Белоруссия». Урэшце могілкі зніклі гэтак жа таямніча, як і з’явіліся, а гісторыю забылі.
Если вас интересуют присяжные переводы с польского языка, то вы можете их заказать здесь. Высокое качество перевода в строго ограниченное время.
