Пчолы, танкі, Мыйдадзір. Дзень сям'і ў Гродне адзначылі парадам калясак

Вазочкі з дэкорам, дзяўчаты з лялькамі-немаўлятамі, духавы аркестр і лімузін — усё гэта ўбачылі гродзенцы 14 траўня на парадзе калясак «Пад ветразем кахання», прысвечаным Дню сям'і. З дэкараванымі вазкамі на свята прыйшлі каля 60 сем’яў. Яны прадстаўлялі арганізацыі горада і ўстановы адукацыі. Калона прайшла ад Савецкай плошчы да парку Жылібера, дзе быў канцэрт і ўрачыстае ўзнагароджанне ўдзельнікаў.

Карэспандэнтка Hrodna.life убачыла ў калоне бэтмабіль, паветраны шар, жар-птушку і нават мабільны тэлефон. Сёлета назіралася нямала калясак і касцюмаў у «пчалавым» стылі.

Натхніў Карней Чукоўскі

З вазком «Мойдадзір» прыйшла на парад сям’я Кішковічаў. Яны ўдзельнічаюць у мерапрыемстве ўжо другі раз. Галоўны ідэйны натхняльнік — маці, яна працуе фармацэўтам. Ідэя стварыць вобраз па вершах Чукоўскага прыйшла спантанна і хутка — вырашылі адразу рабіць. Бацькі распавялі, што малодшая дачка Аліса праспала ў вазочку ўвесь парад, а старэйшую дачку, 4-гадовую Валерыю, свята зацікавіла. «Нядрэнная нагода выбрацца сям’ёй кудысьці, невялікі сямейны вольны час, так бы маўляў», — адзначыў бацька сям'і.

Сям’я Шумскіх таксама натхнілася вершамі Чукоўскага. Ім падказала ідэю казка «Муха-Цакатуха». Сям’я з дзевяцімесячнай дачкой Міяй ўдзельнічае ў парадзе ўпершыню. У касцюм «Мухі» яны прыбралі сваю сабачку, якая таксама ўдзельнічала ў шэсці. З сабой паклікалі блізкіх, каб сумесна правесці гэты выхадны на свяце.

Год гістарычнай памяці на парадзе калясак

Сярод намінацый конкурсу вазочкаў была і прысвечаная Году гістарычнай памяці. Салодкія падарункі за гістарычныя вазкі атрымалі 11 сем’яў.

Шэсце скончылася ў парку Жылібера. Там удзельнікаў чакаў канцэрт і віншаванні ад адміністрацыі Ленінскага раёна, якая арганізавала свята. На мерапрыемстве таксама ўручылі ордэн Маці Святлане Маўдук і яе сям'і.

Пазней каля сцэны для прагляду выступу засталося не так шмат людзей. Большасць разышліся па парку або адправіліся на інтэрактыўныя пляцоўкі збіраць канструктар і маляваць акварэллю малюнкі на твары.

Як гэта было ў мінулыя гады:

• Парад колясок 2019 в Гродно
• Парад колясок 2018 в Гродно