Сяргей Вендзін пераехаў у Гродна з Расіі год таму і за некалькі месяцаў здолеў стварыць праект palomka.net. Ён бясплатна чыніць зламаныя рэчы, а кліенты ахвяруюць адвольныя сумы дабрачыннаму Цэнтру ПАРА. За кошт ахвяраванняў цэнтр падтрымлівае анкапацыентаў, дзяцей і дарослых. Ідэя рамонту рэчаў прывяла да таго, што часцяком кліенты ахвяруюць больш грошай, чым каштуе рамонт. Як нарадзілася ідэя, што часцей за ўсё рамантуюць гродзенцы і колькі гэта каштуе, Сяргей Вендзін распавёў Hrodna.life.
«Я прасякнуўся тым, што людзі тут больш клапатлівыя і адкрытыя. Тут рэальна кайф, я туды не вярнуся ўжо, гэта дакладна», — кажа цяпер пра свой пераезд у Гродна інжынер Сяргей Вендзін. У горадзе ён жыве год на здымнай кватэры.
Сяргей нарадзіўся ў расійскім горадзе Разань, 14 гадоў жыў у Ніжнім Ноўгарадзе. Там з 2010 па 2017 год ён працаваў дырэктарам па новых прадуктах у расійскай тэлекамунікацыйнай кампаніі «Мегафон». За гэты час сваімі рукамі пабудаваў дом.
Змяніўшы некалькі работ, прадаўшы дом і некаторы час павандраваўшы па Расіі, Сяргей з жонкай і сынам прыехалі адпачыць у Беларусь і закахаліся ў Гродне. Вырашылі пажыць тут. Цяпер Сяргей займаецца інавацыйным кансалтынгам, піша заяўкі для «Сколкава» (навукова-тэхналагічны інавацыйны комплекс у Маскве), а ў якасці хобі - малюе дызайн і праектуе сайты.
Сяргей з дзяцінства любіў нешта майстраваць рукамі. Захапленне падтрымлівалі ў сям'і: айчым навучыў яго літаваць, калі ўбачыў, што хлопчык прыляпляе драты да батарэйкі пластылінам.
Дабрачыннасцю Сяргей цікавіўся яшчэ ў Расіі: удзельнічаў у стварэнні сэрвісаў, якія пераводзілі грошы ў дзіцячыя фонды. А прыехаўшы ў Беларусь і пазнаёміўшыся з супрацоўнікамі «Цэнтра ПАРА» у 2019 годзе, вырашыў стварыць уласны праект.
«Я запісаўся да іх у валанцёры, адрамантаваў ім скрыні для збору ахвяраванняў. Спачатку нарадзілася ідэя проста рамантаваць рэчы, а потым ужо падплялося: у абмен вы можаце ахвяраваць дзецям штосьці», — успамінае Вендзін.
У лістападзе 2020 году ідэя добрага сэрвісу канчаткова сфарміравалася. Па словах Сяргея, рукі свярбелі што-небудзь зрабіць.
Як аформіць сэрвіс Сяргей разам са сваёй сям’ёй прыдумаў у кафэ «Прахадная». Там яны рэгулярна праводзілі час і таварыскі Сяргей хутка пазнаёміўся з барыстам Андрэем (цяпер ужо там не працуе).
«У кафэ прыдумалі назву, купілі дамен palomka.net і там барыста Андрэй падказаў, як перакласці клініку рэчаў на беларускую мову. Дзякуючы Андрэю беларуская версія з’явілася». Канцэпцыю праекта і лагатып прыдумалі ў «Прахадной» за паўгадзіны.
Гродзенцы са зламанымі цацкамі і бытавой тэхнікай звяртаюцца да Сяргея ў асноўным праз Instagram (у праекта 343 падпісчыкі). Сяргей кажа, калі ўвесь час не нагадваць пра сябе на гэтай платформе з дапамогай пастоў, плынь кліентаў падае.
Сяргей прымае ў рамонт толькі тое, што можна зрабіць у хатніх умовах з паяльнікам і тэстарам. Звычайна рамонт абыходзіцца ад 2 да 5 рублёў, часта — патрэбна ўсяго кропля клею.
Прыкладна палова заказаў: прылітаваць, прыляпіць. У дзясятай частцы заказаў патрэбныя прыкметныя ўкладанні: замена правадоў або дынамікаў. Прыкладна дзясятак рэчаў за час працы праекту Сяргей не змог адрамантаваць зусім, бо яны не былі рамонтапрыдатнымі.
Прас. Нядаўна прынеслі прас, які забіўся брудам, загнуўся адзін з кантактаў. Сяргей прыбраў пыл і прыбор запрацаваў. «Нічога не выдаткаваў, толькі свой час. Выдатна, калі з нічога адразу штосьці».
Пульсаксіметр. Медыцынскі прыбор для вымярэння ўзроўню насычэння крыві кіслародам для хуткай дапамогі Сяргей рамантаваў два разы.
Гірлянды. Дзякуючы праекту Сяргей пазнаёміўся з беларускай, якая жыве ў Катары. Дзяўчына прыехала на Новы год да бацькоў і прывезла гірлянду ў рамонт.
Апараты для манікюру. З просьбай адрамантаваць лямпы і фрэзер з бракам прыносяць прадпрымальнікі, якія іх прадаюць. «Рамонт быў такі лёгкі, разбіраю, а там драты няправільна прыпаялі. Перестаўляю на месца — працуе!»
Чайнік. Гэты прыбор Сяргей рамантаваў для кафэ «Yellowstreet 17». Але за час рамонту ў кафэ ўжо набылі новы. І цяпер ён шукае чалавека, якому сапраўды патрэбен электрачайнік.
Цацкі. Часта гродзенцы просяць адрамантаваць электронныя музычныя цацкі. «Бывае такое, што людзі прыносяць адразу мех. Я не ведаю, адкуль яны іх бяруць, свае ці з нейкай дзіцячай установы. Некаторыя прыносяць цацку і кажуць: яна занадта ціхая. Я стаўлю ім новы дынамік, і яна грае нашмат гучней. І камусьці цяпер з гэтым жыць прыйдзецца», — смяецца Сяргей.
Першы час кліенты дасылалі Сяргею чэкі, каб даказаць, што яны ахвяравалі грошы цэнтру ПАРА. Сумы былі па 30 і 50 рублёў, хоць рамонт гэтулькі не каштаваў.
Ахвяраваць не абавязкова вялікія сумы. Па словах Сяргея, можна адпраўляць на дабрачыннасць капейкі. Але лепш рабіць гэта рэгулярна. Самы просты спосаб — гэта набраць каманду USSD-
код *222*11# і адправіць з тэлефона 2 рублі.
«Цяпер я надрукаваў візітоўкі, і да кожнай рэчы я прыкладваю іх. Там ёсць адрас сайта ПАРА, дзе пазначаны спосабы ахвяравання», — распавёў Сяргей.
Бывалі ў Сяргея выпадкі, калі людзям дапамагчы не атрымалася, а яны ўсё роўна пасылалі грошы ў дабрачынны фонд. Такім чынам дзякуючы праекту palomka.net гродзенцы больш даведваліся аб дабрачыннасці і спосабах дапамагчы.
«Многія распавядалі, што раней саромеліся адпраўляць маленькую суму. А ўся фішка ў дабрачыннасці не ў тым, каб вялікую суму даць, а ў тым, каб часта гэта рабіць. Лепш 1 рубель у месяц, чым раз у год 50 рублёў. У выніку ты дасі больш, і грошы будуць раўнамерна паступаць».
Колькасць грошай, якія паступаюць у цэнтр «ПАРА» ад кліентаў Сяргея, адсачыць немагчыма, кажа ён.
«Яны казалі, што ахвяраванні выраслі, але мы не ведаем з-за майго рамонту ці не. Нельга казаць, што менавіта гэта прынесла кучу грошай. Хтосьці ахвяруе, хтосьці не, гэта ж не абавязковая ўмова. Тут усё добраахвотна».
Цяпер Сяргей працягвае рамантаваць рэчы, але не плануе маштабаваць свой праект. У яго ёсць і іншыя ідэі дабрачынных сэрвісаў, дэталі якіх ён пакуль абдумвае.
«Мне вельмі імпануе яго дзейнасць, ён з аднаго боку робіць тое, што яму падабаецца, з другога — ён увесь час паведамляе людзям, што можна дапамагаць такім чынам».
Па словах Ганны, вельмі складана адсачыць ахвяраванні, таму што ў шматлікіх плацяжах не відаць імя і прозвішча чалавека. Але тое, што гэта мае сваё значэнне — гэта дакладна.
«Мы ідзем такім добрым тэмпам, і я думаю, што ў гэтым заслуга ў тым ліку Сяргея». Таксама цэнтру ПАРА дапамагаюць салоны прыгажосці і фітнес-цэнтры. «Яны ладзяць флэшмобы, грошыкамі дапамагаюць і збіраюць сродкі гігіены».
Гродзенка Ганна Горбач даведалася пра Сяргея ад сяброўкі ў чаце Viber. У Ганны зламаўся ўвільгатняльнік паветра і дзіцячая цацка. «Сяргей усе адрамантаваў, усё працуе, я задаволеная. Усім яго раю, выдатны чалавек і майстар, захапляюся яго дзейнасцю», — распавяла яна.
Вольга Сімаковіч даведалася пра існаванне сайта palomka.net на форуме мам Гродна. У дзіцяці зламаўся дзіцячы караоке-мікрафон. «Я думала, што там дробязны рамонт, але па выніку ўсё аказалася нашмат складаней. Сяргей важдаўся з мікрафонам каля месяца, за ўласныя грошы купіў неабходныя дэталі, хоць я казала яму,
што не трэба так траціцца! Але Сяргей не кінуў гэтую справу і адрамантаваў. Вельмі прыемна ўсведамляць, што ў нашым горадзе ёсць такі чалавек», — кажа Вольга.
Да знаёмства з Сяргеем Вольга ахвяравала з мужам на дабрачыннасць і зараз яны працягваюць гэта рабіць. «Сумы невялікія, але ў такой справе кожная капейка мае значэнне».
Алена Таміліна і Мікалай Старадубаў прывезлі на рамонт Сяргею навагоднія гірлянды. І тады зразумелі, што яны даўно знаёмыя: «Часта ходзім на мерапрыемствы накшталт startup weekend і іншыя. Гэта была выдатны нагода пазнаёміцца бліжэй з выдатнай сям’ёй». Алена ўпэўненая, што дабрачыннасць, дапамога іншым — унутраная патрэба нармальнага чалавека. Яе сям’я рэгулярна дапамагае падарункамі і грашыма.
«Апошні раз сабралі вялікі кошык касметыкі для глуханямога хлопца, якому спаўнялася 18 гадоў, хацелі працу прапанаваць, але нас апярэдзілі. Ён працаўладкаваны і гэта выдатна!» — кажа яна.
У міжваенны час Гродна набыло незвычайную славу. Горад стаў месцам прыцягнення незвычайных турыстаў - тых,…
Ці хапае ў цэнтры Гродна прадуктовых крам? Спрэчкі наконт гэтага выклікала адкрыццё на перакрыжаванні Савецкай…
Прыбраныя ялінкі, свечкі, навагоднія вянкі і гірлянды, аксаміт, светлы ці цёмны фон на выбар. Гродзенскія…
Улады стварылі новую платформу “меркаванне.бел”. Яе пазіцыянуюць як анлайн-пляцоўку, на якой кожны зможа ў вольнай…
Калекцыя адзення гродзенкі Кацярыны Карлацяну дэбютавала гэтай восенню на Парыжскім тыдні моды. А пачыналася ўсё…
Гродзенец Раман Нагула амаль паўжыцця працуе з дрэвам. Школьнікам ён пачынаў з бейсбольных біт, а…