«Нёманская вясна» праводзіцца ў ваколіцах Аўгустоўскага канала ўжо 42 гады. Сёлета фестываль прайшоў 5−7 красавіка на рэчцы Асташанцы. Да беларускіх турыстаў-воднікаў далучыліся госці з Масквы і Калінінграда. Апроч спартыўных імпрэзаў гасцей фэсту чакалі аніматары ў стылі Шалёнага Макса, гульні і забавы. Навічкі ў водным спорце атрымалі майстар-клас па кіраванні байдаркай, а самыя галодныя турысты паўдзельнічалі ў конкурсе на хуткаснае паяданне тушонкі.

Нёманская вясна-2019: Шалёны Макс разбудзіў турыстаў-воднікаў ад спячкі і накарміў тушонкай

«Гэта не кубак і не чэмпіянат, тут не ўсталёўваюць рэкорды і не даюць разрады, — патлумачыў галоўны суддзя спаборніцтваў Сяргей Ціхановіч. — Але гэта пачатак воднага турыстычнага сезону, калі воднікі „прачынаюцца ад спячкі“. Гэта магчымасць сустрэцца, павучыцца адзін у аднаго, запланаваць сумесныя паходы».

Сяргей Ціхановіч кажа, што судзіць на гэтым фэсце «усё свядомае жыццё» і памятае гісторыю фестываля ад самага пачатку. У першыя гады гэта быў «Матч гарадоў», у якім бралі ўдзел спартсмены з Гродна, Коўна, Вільні і Калінінграда. Пазней першыя вясновыя спаборніцтвы праходзілі ў фармаце чэмпіяната вобласці і рэспубліканскіх спаборніцтваў па тэхніцы воднага турызму. Апошнія гады Нёманская вясна стала фестывалем і атрымала міжнародны статус. У розныя гады ў фестывалі ўдзельнічалі польскія і літоўскія спартсмены. Сёлета на Асташанку прыехала некалькі каманд з Расіі.

Нёманская вясна-2019: Шалёны Макс разбудзіў турыстаў-воднікаў ад спячкі і накарміў тушонкай

Аляксандр Ярмалюк з Калінінграда прыехаў на спаборніцтвы ўпершыню і разам з сям’ёй. Кажа, што пабачылі аб’яву і вырашылі паехаць у падарожжа і паўдзельнічаць у фестывалі. «Чаму было б не паехаць? Не толькі ж на сваёй рэчцы сядзець! Хочацца і на другія мясціны паглядзець і з новымі людзьмі пазнаеміцца».

Нёманская вясна-2019: Шалёны Макс разбудзіў турыстаў-воднікаў ад спячкі і накарміў тушонкай

«Мы жывём у Гродне ўжо некалькі гадоў, пераехалі сюды з Данецка, — расказаў Грыгорый Краўчанка. — Хадзілі ў паходы ад 2004 года. Як прыехалі ў Гродна, сталі шукаць мясцовых воднікаў праз інтэрнэт. Яны адразу адклікнуліся — турысты заўжды дружныя людзі». Нагода прыехаць на «Нёманскую вясну» ў сям'і вельмі простая: гэта першы выхад на ваду, магчымасць сустрэцца з сябрамі. «У паходы ідуць групамі, кожны ў свой зручны час. А тут можна ўсім разам сабрацца».

Нёманская вясна-2019: Шалёны Макс разбудзіў турыстаў-воднікаў ад спячкі і накарміў тушонкай

Адна з адметнасцяў сёлетняга фестывалю — вялікая колькасць дзяцей і забаваў не толькі для спартсменаў. «Сюды прыязджаюць цэлымі сем’ямі, з дзецьмі і любімымі цёшчамі, са шваграмі і са свёкрамі, — кажа Сяргей Каляда з аргкамітэту фестывалю. — То зараз кожнаму ёсць чым заняцца. Тут і музыка, і анімацыя. Можна і каву набыць і нейкі бургер, а не толькі стаяць і пазіраць на ваду».

Нечаканы погляд на турыстаў прапанавала каманда аніматараў разам з самым «смачным» спонсарам фестывалю.

«Турысты, гэта такія людзі, каторыя набіраюць поўны заплечнік смакоткаў і сыходзяць як мага далей ад горада, каб самім усё з’есці», — раскрыў таямніцу «капітан» шалёных аніматараў Васіль Калач.

Нёманская вясна-2019: Шалёны Макс разбудзіў турыстаў-воднікаў ад спячкі і накарміў тушонкай

На фестывалі для ахвотных пад’есці праводзілі «Турнір абжор» на хуткаснае паяданне тушонкі. Самы лепшы вынік - 1 мінута і 20 секунд на банку. Асабліва ўразіла, што спаборніцтвы праходзілі ў тры заходы і пераможцы з’елі па тры банкі тушонкі. Прызамі для іх стала таксама тушонка. Цікава, ці будуць яе есці таксама хутка?

Нёманская вясна-2019: Шалёны Макс разбудзіў турыстаў-воднікаў ад спячкі і накарміў тушонкай

Праводзіць фестываль міністэрства спорту і турызму, але мае і некалькі сталых мецэнатаў з Гродна. Адзін з іх — былы горналыжнік, альпініст і марафонец Леанід Зальцман. Сёлета ён дапамог набыць прызы для дзіцячых спаборніцтваў фестывалю. «Я вельмі сталы турыст, больш за 60 гадоў са сваіх 82 займаўся спортам. Раней жыў ва Украіне, потым пераехаў у Беларусь. Знайшоў тут калегаў і мы сталі сябрамі. Фестываль падтрымліваю ўжо трэці год». Каштоўнасць «Нёманскай вясны», яго меркаваннем, у тым, каб ізноўку выйсці на ваду: «Галоўнае, пераадалець сябе. Перамога сама прыйдзе».

Для тых, хто ні разу не трымаў вясло ў руках, на фестывалі была магчымасць паспрабаваць сябе ў якасці «матроса» ці «капітана» і прайсці першыя метры па рацэ. «Каб пачаць падарожжа на байдарцы ў яе трэба сесці», — жартуе з навічкамі інструктар Павел Сурмач.

Далей пару словаў пра тое, як табаніць і руліць і - наперад. Ахвотных знаходіцца нямала. Адным з удзельнікаў майстар-класса быў Міша Кіркіцкі. Праўда, ён быў практычна гуляючым трэнерам. У 13 гадоў хлопец мае ўжо 2-гі дарослы разрад. Сёлетні сезон для яго пачаўся ў канцы лютага. Ад таго часу — кожны дзень не менш за 20 кіламетраў праходзіць на трэніроўках. На фестываль Кіркіцкія прыехалі ўсёй сям’ёй.

Нёманская вясна-2019: Шалёны Макс разбудзіў турыстаў-воднікаў ад спячкі і накарміў тушонкай

Першым аматарам воднага турызму ў сям'і быў тата Яўген: «Цяга да вады ўсё жыццё была. Плаваннем займаўся, на байдарках хадзіў. Потым сын падрос і яго таксама браў на байдарку. Ходзім з сям’ёй па Нёмане, па Чорнай Ганьчы, па Юбілейным. Сёлета Міша ўжо прайшоў 350 кіламетраў на каноэ. Я — трохі менш. Яшчэ ж і на працу трэба хадзіць».

Многія з тых, што на фестывалі паспрабавалі прайсці на байдарцы ўпершыню, абавязкова да яе вернуцца, мяркуе Павал Сурмач:

«Нават калі ад пачатку падаецца што страшна, калі шок. Нехта праз месяц, нехта праз год успамінаў, як было крута і прыходзіў паўтарыць. Нехта пачынаў кожны тыдзень з намі хадзіць. Некаторых на наступны год ужо спрактыкаванымі турыстамі на фестывалі сустрэнем».

Перадрук матэрыялаў Hrodna.life магчымая толькі з пісьмовага дазволу рэдакцыі. Кантакт info@hrodna.life

Каля Гродна з 5 па 7 красавіка пройдзе міжнародны фестываль воднага турызму «Нёманская вясна-2019». Гэтае мерапрыемства традыцыйна адкрывае сезон актыўнага адпачынку на Аўгустоўскім канале.

У рамках «Нёманскай вясны» пройдуць спаборніцтвы на байдарках (каяках, каноэ) і катамаранах у асабістым і камандным заліках. Удзельнікі прыедуць з Беларусі, Польшчы, Літвы, Украіны і Расіі. Разам са спаборніцтвамі на фестывалі будзе праходзіць музычны оpen-air з удзелам гуртоў «Бадзяжныя Каты» (Гродна), «Вочы» (Гродна), «777» (Гродна), «Раса мечтателей» (Гродна), «Разбітае Сэрца Пацана» (Мінск) і іншых.

«Гэты фестываль не толькі для спартсменаў, але і для аматараў актыўнага адпачынку. Каманда арганізатараў паспрабавала палепшыць праграму фестывалю ў гэтым годзе, — распавядае рэжысёр Васіль Калач. — Мы не забыліся і пра гасцей фестывалю. Для іх у нас вялікая колькасць забаваў: ад музыкі пад адкрытым небам да майстар-класаў на вадзе».

Усе жадаючыя змогуць паўдзельнічаць у «турніры абжораў» — паяданні тушонкі на хуткасць. Удзельнікаў і пераможцаў чакаюць прызы і падарункі ад спонсараў. Настольныя гульні прадставіць цэнтр «Партал» — будзе працаваць палявая гульнятэка. Гасцей фестывалю чакаюць air-soft цір, цір па стральбе з лука, тарзанка даўжынёй 250 метраў, дзіцячая паласа перашкод, фудкорт і многае іншае.

Госці змогуць паставіць палатку ў намётавым полі, прывезці з сабой мангал і адкрыць для сябе сезон пікнікоў.

«Фэст» Нёманская вясна «- выдатная магчымасць адпачыць на прыродзе ўсёй сям’ёй», — кажа Васіль Калач.

Сёлетні фестываль будзе аформлены ў стылістыцы постапакаліпсісу (атмасфера такіх фільмаў як «Mad Max», «Водны свет» і г. д.). У праграме: Freak Show на адкрыцці фестывалю, фотазоны, экстрым-шоў на вадзе ад фрык-тэатра «Гексаген» і Freak Show group «Mascarada Matador», у тым ліку каскадзёрскія трукі і абардаж. Цвіком вечаровай праграмы фестывалю стане канцэрт гурта «Всё_CRAZY» (Мінск) на плывучай сцэне.

Праграма фестывалю на 6 красавіка:

10.00 — тэатралізаванае прывітанне ўдзельнікаў спартовай часткі
з 12.00 — працуюць фуд-корты, гульнятэка, air-soft цір і Archery Tag, атракцыёны
12.00−14.00 и 16.00−18.00 — дзіцячая паласа перашкод
13.00 — тэатралізаванае адкрыццё фестывалю
14.00 — музычны оpen-air — «Бадзяжныя Каты» (Гродна), «Вочы» (Гродна), «777» (Гродна), «Раса мечтателей» (Гродна), «Разбітае Сэрца Пацана» (Мінск).
14.30 — майстер-клас па кіраванні байдаркай.
16.00 — экстрым-шоў на вадзе ад фрык-тэатра «Гексаген» і Freak Show group «Mascarada Matador» — каскадзёрскія трукі і абардаж!
18.30 -ТУРНІР АБЖОРАЎ
15.30 — пачатак працы тарзанкі (250 метраў над ракой)
19.30−22.00 — Музычны оpen-air на воднай сцэне — гурт «Всё_CRAZY» (Мінск)

Перадрук матэрыялаў Hrodna.life магчымая толькі з пісьмовага дазволу рэдакцыі. Кантакт info@hrodna.life