«Новы Свет — гэта наша гісторыя». Чытачка распавядае пра сваю сям’ю, якая жыве на Міцкевіча больш за 100 гадоў

Чытачы Hrodna.life працягваюць распавядаць пра свае гродзенскія сем'і і паказваць старыя здымкі. На гэты раз у нас гісторыя сям'і Мінючыц, якая жыве ў Новым Свеце на вуліцы Міцкевіча ўжо больш за 100 гадоў.

Нагадаем, Анастасія Мінючыц ужо паказвала нам свае ўнікальныя фатаграфіі старога моста каля Парку высокіх тэхналогій. Зараз дзяўчына паказала сямейны альбом, дзе можна ўбачыць фатаграфіі як пачатку XX стагоддзя, так і міжваеннага перыяду.

Сям’я Мінючыц купіла дом № 1 на вуліцы Міцкевіча ў самым пачатку XX стагоддзя і да гэтага часу там жыве.

«Як мне вядома, карані нашай сям'і сыходзяць недзе пад Вільню. Наш прапрадедушка па прозвішчы Якубоўскі прымаў удзел у паўстанні ў 1863 годзе і за гэта быў сасланы ў Сібір і страціў свой багаты маёнтак. Калі зараз падняць дакументы, мы можам прэтэндаваць нават на кампенсацыю, але гэтым ніхто не займаецца.

У ссылцы прапрадзед пазнаёміўся з сібірачкай і адтуль яны, напэўна, ужо разам прыехалі ў Гродна. Дом № 1 на вуліцы Міцкевіча купляла ўжо мая прабабуля. Там нарадзіўся дзядуля і тата, ну і мы, іх нашчадкі».

У сям'і Мінючыц да сённяшняга дня захаваўся вялікі архіў фатаграфій розных перыядаў.

«Фатаграфіі ў нас зусім розныя: з пачатку XX стагоддзя і заканчваючы савецкім перыядам. Ёсць і шмат здымкаў з Аргентыны. Яшчэ ў міжваенны перыяд нашы сваякі з’ехалі ў Буэнас-Айрэс і да 1939 года з імі актыўна вялася перапіска. Але пасля вайны сувязь з сям’ёй за акіянам абарвалася».

Анастасія расказвае, што ў іх сям'і актыўна займаліся развядзеннем сабак, так як прадзед быў паляўнічым. А прабабуля вядомым краўцом, у яе шылі сабе вопратку многія жыхары Новага Свету.

«Ужо больш за 100 гадоў у адным і тым жа доме на вуліцы Міцкевіча жыве наша сям’я і чуткі аб зносе старых пабудоў ў Новым Свеце вельмі насцярожваюць. Бацькам у 2018 годзе нават паведамленне прыходзіла аб тым, што зямлю могуць выставіць на аўкцыён, а жыхарам даць кампенсацыю.

Але трэба разумець, што наш дом на Міцкевіча, як і іншыя пабудовы ў Новым свеце, гэта ўжо гісторыя горада, якую мы павінны захаваць. Бо ў Новым Свеце ёсць што паказаць і расказаць».

Паводле інфармацыі Hrodna.life на рагу вуліц Горкага і Міцкевіча горад у перспектыве хоча пабудаваць гандлёвы цэнтр. На сённяшні дзень ідзе пошук інвестара.