Атракцыёнам у парку Жылібера вырашылі памяняць дызайн: іх аформяць тэматычна. Першымі абнавілі амерыканскія горкі. Лесвіцу да атракцыёна і парапет задэкаравалі плітамі з выявамі культуры племя мая і іх пісьменства. Побач з’явіліся бетонныя дыскі – Камень сонца і Камень смерці ацтэкаў і пліта з “касманаўтам” з Паленке. Гэта паменшаныя копіі старажытных артэфактаў.
Ідэя ўласнікаў у тым, каб з часам зрабіць рэдызайн усіх атракцыёнаў. Напрыклад, у парк збіраюцца вярнуць атракцыён “Лебедзі”. “Раз лебедзі – значыць, побач будзе нейкае возера, вада. Мы ўжо дасягнулі такога ўзроўню, што можам заказваць у вытворцаў атракцыён пад сябе”, – распавёў Hrodna.life ўладальнік парку атракцыёнаў Юрый Солтан.
“Ёсць ідэя выявіць усе цуды свету і славутасці, пачалі з мая”, – патлумачыў уладальнік атракцыёнаў. Побач з атракцыёнамі плануюць уладкаваць і тэматычную дзіцячую пляцоўку.
Сляды мая ў Гродне
Частку дэкору “у стылі майя” на амерыканскіх горках адлілі з бетону, частку – выразалі з пенапласту і пакрылі спецыяльным грунтам, пігментамі і поліўрэтанавым лакам. Пасля апрацоўкі пліткі досыць трывалыя – проста так прабіць рукой іх нельга. Каб элементы выглядалі больш натуральна, на іх хочуць вырасціць мох. Пазней з’явіцца і дадатковае асвятленне.
Над дэкорам працавала цэлая каманда. Барэльефы стваралі паводле фатаграфій рэальных помнікаў культуры плямёнаў мая і ацтэкаў.
Малюнкі выразалі з пенапласту на ЧПУ-станку, які спецыяльна для гэтага сабраў Ігар Малахоўскі. На аснове фатаграфій арыгіналаў артэфактаў ён стварыў 3D-мадэлі, паводле якіх ужо і выразаў барэльефы.
Копія пліты, якая пакрывала саркафаг К’ініч Ханааб Пакаля I у “Храме надпісаў” у Паленке (Мексіка) – так званы “касманаўт Паленке” (“астранаўт Паленке”). Арыгінал – каля 2 м шырынёй. Яе плануюць умантаваць у плітку
Уручную эфект каменя і пігменты на пліты наносіў дызайнер Ігар Кулакоўскі. Ён займаецца дызайнам інтэр’ераў, дэкарыраваннем, некалькі гадоў працаваў за мяжой.
Чытайце таксама:
