Кватэру з відам на Свята-Раства-Багародзічны жаночы манастыр або на Фарны касцёл можна купіць у Гродне. Ад пад’ездаў пачынаецца пешаходная зона, а да Савецкай вуліцы — 200 метраў. Рэдакцыя Hrodna.life паглядзела сайты агенцтваў па нерухомасці і прапануе купіць кватэру ў самым цэнтры Гродна.
З відам на манастыр
Аднапакаёвую кватэру ў гістарычным цэнтры на вул. Замкавай, 14 можна купіць у Гродне. Прадаўцы адзначаюць, што гэта адна з найстарэйшых гарадскіх вуліц працягласцю каля 300 метраў. Кватэра размешчана на трэцім паверсе трохпавярховага цаглянага дома 1900 года пабудовы. Ён з’яўляецца гісторыка-культурнай каштоўнасцю Беларусі.
Вокны кватэры выходзяць у двор на Свята-Раства-Багародзічны жаночы манастыр. Побач — музей рэлігіі, пажарная каланча, Стары і Новы замкі, сінагога. У пешай даступнасці гістарычны цэнтр, набярэжная з пляжам, месцы для вольнага часу і адпачынку.
Агульная плошча кватэру — 27, 6 кв.м, жылая — 14, 5 кв. м, кухня — 6, 7 кв. м. Санвузел сумешчаны. Кватэра акуратная і гатовая для пражывання. Яна падыходзіць для здачы на суткі, адзначаюць прадаўцы. Кошт — $ 35 000.
Ля Фарнага касцёла
Можна набыць кватэру на вул. Карла Маркса, 19. Ад кватэры да Фарнага касцёла і пешаходнай Савецкай вуліцы — 260 метраў. Да касцёла Звеставання Дзевы Марыі - 100. Вокны кватэры выходзяць на двор і ў сад.
Дом 1890 года адносіцца да гістарычных помнікаў горада і капітальна адрамантаваны. Прадаўцы абяцаюць акуратны пад’езд і інтэлігентных суседзяў.
Плошча кватэры — 73 кв. м. Рамонту няма. Кошт — $ 59 000.
Кватэра ў турмы
У продажы таксама двухпакаёвая кватэра на вул. Кірава, 4. Яна размешчана на апошнім паверсе трохпавярховага дома. Вокны кватэры выходзяць на двор. З іх адкрываецца від на Фарны касцёл, гістарычныя будынкі вуліц Савецкай і Калючынскай, новую забудову на вул.Калючынскай, 21 і 23. Пешаходная зона пачынаецца ад пад’езда дома. Год пабудовы будынка — 1900.
Агульная плошча кватэры — 43,8 м². Кватэра без рамонту, замененыя толькі сантэхнічныя трубы, устаноўлены лічыльнікі вады. Кватэра таксама падыдзе для здачы на суткі. Кошт — $ 42 000.
Кватэра ў сталінцы
Можна набыць двухпакаёвую кватэру на вул. Сацыялістычнай, 28. Яна знаходзіцца на першым паверсе двухпавярховага цаглянага дома 1951 года пабудовы — «сталінкі».
Агульная плошча — 45.6 кв. м. Кватэра без рамонту і без мэблі, але ў здавальняючым стане. Уваходныя дзверы драўляныя, падлогі дашчаныя. Аконныя рамы драўляныя. Столі і сцены пафарбаваны.
У калідоры кватэры размяшчаецца камора, ёсць падвальнае памяшканне. Пад’езд чысты, акуратны, суседзі спакойныя і добразычлівыя, запэўніваюць прадаўцы. Вокны кватэры выходзяць на двор. Ёсць прылеглая тэрыторыя, на якой высаджаны шматгадовыя кветкі, пладовыя дрэвы і елка.
Кватэру можна вывесці ў нежылы фонд і здаваць у арэнду. Кошт — $ 43 000.
Кватэра для бізнесу
Можна купіць двухпакаёвую кватэру на вул. Вялікая Траецкая, 16. Яна знаходзіцца на першым паверсе ў цагляным доме. Дом 1889 года пабудовы — гісторыка-культурная каштоўнасць Беларусі. Ад пад’езда пачынаецца пешаходная зона гістарычнага цэнтра.
Агульная плошча кватэры — 50,8 м². Ёсць падвал. Кватэра з рамонтам і гатовая да пражывання, лічаць прадаўцы. Тут таксама можна арганізаваць бізнэс. Кошт — $ 59 500.
Чытайце таксама: Нерухомасць тыдня: трохпакаёвая кватэра з зямельным участкам у Каложскім парку
