У Шчучынскім раёне прадаюць дзейны аграбізнес — пладовы сад у вёсцы Кобраўцы. За гаспадарку просяць 2 422 800 рублёў — каля $800 тыс. паводле курса на 30 верасня 2026 года. У кошт уваходзяць халадзільныя сховішчы на 590 тон, чатыры трактары, двухпавярховы дом і інфраструктура для вырошчвання і захоўвання ўраджаю.
Аб’ява размешчана на пляцоўцы B4Y. Гаспадарка знаходзіцца ў Астрынскім сельсавеце. Прадавец пазіцыянуе яе як гатовы аграбізнес: паводле яго слоў, асноўныя вытворчыя працэсы арганізаваныя, а новы ўладальнік зможа працягнуць працу з першага дня.
Што расце ў садзе
Пладовы сад займае 25 гектараў. Паводле аб’явы, уся плошча занятая пладовымі культурамі, насаджэнні дагледжаныя і пладаносяць.
У садзе вырошчваюць яблыкі сартоў Глостэр, Джонагалд, Рэд Чыф, Эвеліна, Хані Крысп, Алеся, Айдарэд, Прынц, Муна, Сябрына, Рэд Прынц і іншых.
Для паліву абсталяваная аўтаматызаваная кропельная сістэма. У гаспадаркі ёсць уласныя свідравіны і сажалка, а таксама інфраструктура для абслугоўвання саду.
Сховішчы, тэхніка і двухпавярховы дом
На тэрыторыі размешчаныя тры халадзільныя сховішчы агульнай умяшчальнасцю 590 тон.
Уласныя сховішчы, як паведамляецца, дазваляюць захоўваць ураджай і прадаваць яго пазней. Як адзначае прадавец, гэта дае магчымасць дачакацца больш выгаднага перыяду для рэалізацыі прадукцыі.
Таксама ў склад бізнесу ўваходзяць чатыры трактары і спадарожнае абсталяванне, неабходнае для абслугоўвання пладовага саду. Яшчэ пакупніку прапануюць двухпавярховы дом, вытворчую і гаспадарчую інфраструктуру. Да самой фермерскай гаспадаркі вядзе асфальтаваная дарога.
Паводле ацэнкі прадаўца, аб’ект можа зацікавіць аграпрадпрыемства, якое хоча пашырыць вытворчасць, або інвестара, які разлічвае атрымліваць даход ад вырошчвання, захоўвання і продажу пладоў. Ён сцвярджае, што дадатковых капітальных укладанняў гаспадарка не патрабуе. Пры гэтым звестак пра ўраджайнасць, выручку, выдаткі і тэрмін акупнасці ў аб’яве няма.
У Instagram спрачаюцца пра цану і прыбытковасць
Пад постам пра продаж гаспадаркі ў Instagram карыстальнікі пытаюцца пра тэрміны акупнасці і абарот бізнесу. На пытанне пра абарот аўтары публікацыі прапанавалі звярнуцца да ўласніка па тэлефоне з аб’явы. Іншы каментатар пацікавіўся, ці можна набыць тэхніку асобна.
Ацэнкі кошту разышліся: адны напісалі «Амаль задарма» і «Нешта вельмі танна», іншыя — «Дарагія яблычкі» і «Мне такія грошы могуць толькі прысніцца».
Частка карыстальнікаў усумнілася ў прыбытковасці гаспадаркі, выказаўшы меркаванне, што прыбытковы бізнес не сталі б прадаваць. Іншыя запярэчылі, што прычына продажу можа быць звязаная з узростам уладальнікаў і адсутнасцю тых, каму можна перадаць справу.
«Купіць можна, але ж там яшчэ і працаваць трэба без выхадных», — адзначыла адна з удзельніц абмеркавання.
