«Акцэнт» пашыў пальчаткі, «Макей» — сумкі. Як гродзенка паказала сваю калекцыю на Тыдні моды ў Парыжы

Гродзенка Кацярына Карлацяну, заснавальніца брэнда Krikate («Крыкейт»), паказала сваю калекцыю на Тыдні моды ў Парыжы. Яна назвала яе ў гонар старажытнагрэцкага бога, а аксесуары адмыслова для паказу шылі на гродзенскай пальчаткавай фабрыцы «Акцэнт» і ў «Макеі». Гродзенскі паказ калекцыі Кацярына марыць правесці ў цэху старога завода.

На Тыдзень моды ў Парыжы Кацярына трапіла на запрашэнне Беларускай палаты моды. На падрыхтоўку было ўсяго два месяцы, расказала яна «Вечернему Гродно». Месяц пайшоў на прыдумванне канцэпцыі калекцыі, і адна ноч — на стварэнне эскізаў. Яшчэ месяц заняў пошук мадэляў, стылістаў і візажыстаў і выраб аксэсуараў. Дапамагалі сябры і падпісчыкі з Instagram, дзве дзяўчыны працавалі валанцёрамі на паказе.

Тыдзень моды ў Парыжы, які прадстаўляе калекцыі вясна-лета 2025, прайшоў з 25 верасня па 1 кастрычніка 2024 года. Свае новыя калекцыі прадставілі вядучыя модныя дамы, такія як Chanel, Louis Vuitton і Dior. Парыжскі Тыдзень моды лічыцца адной з самых важных падзей у індустрыі.

Калекцыю яна назвала «Зефір» — па імі старажытнагрэцкага бога ветра. У яе канцэпцыю закладзены сімвалізм жаночай сілы, якая можа быць як разбуральнай, так і стваральнай. Калекцыю выканалі ў паветраным стылі, з лёгкіх тканін, з аб’ёмнымі формамі. Паводле эскізаў Кацярыны гродзенская фабрыка «Акцэнт» адшыла пальчаткі, а «Макей» распрацаваў сумкі. Спецыяльна для паказу калекцыі напісалі 12-хвілінную музычную кампазіцыю з хорам і арганам.

Пасля паказу Кацярына пазнаёмілася з прадстаўніком моднага дома Dior, з якім працягвае камунікаваць і абмяркоўвае, дзе яшчэ можна арганізаваць паказ. Кацярына плануе паказаць калекцыю і ў Гродне — марыць, каб гэта было ў старым завадскім цэху.

Гісторыя брэнда і поспеху

Кацярына займалася дызайнам з 16 гадоў і атрымала першую адукацыю ў каледжы лёгкай прамысловасці. Першым поспехам стала перамога ў конкурсе «Млын моды». Калекцыю з конкурсу яна адшыла яшчэ раз і прадала. Пасля каледжа скончыла ВНУ па спецыяльнасці «інжынер-канструктар». Восем гадоў адпрацавала на фабрыцы «Элод» у Гродне. У 2014 годзе гродзенка заснавала свой брэнд мятлікаў-гальштукаў, якія прынеслі ёй вядомасць і прадаваліся ў Беларусі і за мяжой. У 2018 годзе яна адкрыла атэлье, дзе сама выконвала ўсе функцыі. Брэнд Krikate — «Крыкейт» — атрымаў сваю назву ад першых літар яе імя і дзявочага прозвішча.

Цяпер у Krikate 56 супрацоўнікаў, фірмовыя крамы ў Мінску і Гродне, а таксама планы пашырэння на іншыя гарады Беларусі і Маскву. Заказы на адзенне брэнда афармляюць нават з Амерыкі. Кацярына выпускае абмежаваныя калекцыі для жанчын і рыхтуецца да запуску мужчынскай лініі Ro.man, названай у гонар сына.

Брэнд арыентуецца на малыя партыі і частыя абнаўленні мадэльнага шэрагу.

Чытайце таксама: У Гродна стварылі новы брэнд мужчынскага адзення Action