На тэрыторыі былога водазабору ў Пышках будуюць гасцінічны комплекс. Гатэль будзе вытрыманы ў касмічнай стылістыцы, а яго галоўнай асаблівасцю стане глэмпінг у выглядзе паўсфер. Пра тое, што менавіта з’явіцца ў новым комплексе, распавядае Onliner.by.
Глэмпінг — разнавіднасць кэмпінгу, якая аб’ядноўвае ў сабе камфорт гасцінічнага нумара з магчымасцю адпачынку на прыродзе.
На тэрыторыі водазабору знайшлі бункер, які раней быў запоўнены вадой
Тэрыторыю былога водазабору ў Пышках выставілі на аўкцыён у чэрвені 2023 года. Па ўмовах пакупнік павінен быў рэканструяваць яго пад лячэбна-аздараўленчы, курортна-рэкрэацыйны або турыстычны аб’ект.
Пакупнік агледзеў лот перад падачай заяўкі. Вывучаў у асноўным тое, што знаходзілася над паверхняй зямлі, і ўжо меркаваў, што можна будзе пабудаваць на тэрыторыі. Напрыклад, гатэль з высокімі столямі ў нумарах і будынак для рэстарана.
— Але галоўны сюрпрыз чакаў нас ужо пасля таго, як таргі адбыліся. Пры больш дэталёвым аглядзе высветлілася, што гэты будынак мае падземную частку ўражваюых памераў. А менавіта «чан» глыбінёй 15 метраў. Раней ён пад завязку быў запоўнены вадой. Цяпер вось ламаем галаву, што з гэтым рабіць. Тут сцены і перакрыцці таўшчынёй ледзь не два метры. Суцэльны жалезабетон. Спрабавалі свідраваць — не-а, не прабіць іх. Сябры жартуюць, што можна бункер на выпадак апакаліпсісу ўладкаваць. Ну ці заліць усё вадой і праводзіць навучанне для дайвераў, — адзначае гаспадар.
Агулам з’явіцца шэсць паўсфер — жыць там можна ў любую пару года
Пакуль рэканструкцыю будынка былога водазабору адклалі на будучыню. Цяпер прадпрымальнік займаецца будаўніцтвам гасцінічнага комплексу. Плануецца, што з восені 2025 года база адпачынку пачне працаваць.
Па тэме: Акрамя паўсфер у Пышках з’явіцца рэстаран і гасцініца — вось як яны будуць выглядаць
Згодна з праектам, на тэрыторыі павінна з’явіцца шэсць шатроў. Тры з іх будуць знаходзіцца на ніжняй тэрасе, бліжэй да вады. Астатнія тры — наверсе. Плошча домікаў складае 38 і 48 кв.м. Кожны з іх разлічаны на знаходжанне чатырох чалавек. Унутры будзе асобны санвузел, шафа, адкрытыя месцы захоўвання і ложак.
Паўсферы выраблены з каркаса, абцягнутага ПВХ-тканінай, мембранамі, уцяпляльнікам і дэкаратыўным матэрыялам. Туды ж уманціравана вентыляцыя і пластыкавае акно.
Нумары разлічаны на пражыванне круглы год: ацяпляцца шатры будуць за кошт цёплай падлогі, а празрыстасць панарамнага акна будзе забяспечвацца за кошт кабелю, якім абвіты каркас.
— Нягледзячы на тое што аб’ект эксплуатаваўся, усе камунікацыі нам даводзіцца пракладаць нанова. Падвесці электрычнасць, ваду, каналізацыю. Гэта вельмі няпроста. Асабліва ўлічваючы адлегласць да «горада». Каля года на ўсё пайшло. І яшчэ шмат працы наперадзе. Таксама трэба будзе абгарадзіць нашу тэрыторыю з боку берага, каб людзі былі ў бяспецы.
У гасцінічнага комплексу пляжу не будзе, а вось пірс — магчыма
Уладкоўваць пляж на тэрыторыі прадпрымальнік не плануе. Затое разважае над пірсам для рыбакоў.
— Праўда, для гэтага трэба атрымаць узгадненне — працэс няпросты, бо тут водаахоўная і рэкрэацыйная зона, — тлумачыць гаспадар.
Устанаўліваць новыя шатры прадпрымальнік пачне вясной 2025 года. Па словах бізнесмена, калі б ён ведаў, як шмат узнікне пытанняў з падключэннем да камунікацый, наўрад ці б звязаўся з гэтым аб’ектам.
— А цяпер ужо адступаць няма куды. Ды і самім цікава, што з гэтага ў выніку атрымаецца, — адзначае бізнесмен.
