Dzieciuki далі першы сольны канцэрт у Гродне і сабралі 200 наведвальнікаў

Упершыню за сем год існавання гурта ўлады дазволілі Dzieciuk’ам даць сольны канцэрт у Гродне. 21 снежня гурт выступіў у BIG BAR, дзе сабраў больш за 200 наведвальнікаў. Да гэтага ў гурта былі гаражныя выступы і ўдзел у зборных канцэртах кшталту байк-рок-фестываля «Хавайся ў бульбу».

— Слухайце, ну што за пытанне: як гэта — выступаць у родным горадзе? Гэта ж родны горад! Гэтым усё сказана! — эмацыйна адказвае лідар гурта Алесь Дзянісаў. — Мы гралі пару-тройку падпольных канцаў, нас запрашалі тройчы на свае імпрэзы за горадам гродзенскія байкеры з клуба «Насарогі», за што ім вялікі рэспект, бо не спужаліся; але гэты канц будзе першым афіцыйна дазволеным сольнікам. Мы чакалі яго сем доўгіх гадоў…

Заходзім на пляцоўку каля бара, дзе ўключаюць музыку гурта. Амаль усе людзі - знаёмыя. На ўваходзе сустракаем невялікую чаргу. «Мы ніколі нічога не разлічваем. Прыйдзе 20 чалавек — будзем спяваць для 20. Але, паверце, будзе поўная зала», — кажа Дзянісаў. І праўда, як скажуць пазней арганізатары, у гродзенскі BIG BAR набілася 230 чалавек.

Праз некалькі хвілін на канцэрце майку можна выціскаць — горача. Музыканты праводзяць невялікую пераклічку. Прыехалі наведвальнікі з Мінска, Брэста, Слоніма, Беластока. «Гэта неверагодна — я іду праз натоўп людзей і з кожным вітаюся», — кажа Алесь. І пачуваліся музыканты, здаецца, яшчэ больш разняволена.

На канцэрце панавала амаль сямейная атмасфера. Напрыклад, людзей, у якіх у дзень выступу быў дзень нараджэння, запрасілі на сцэну і павіншавалі.

Алесь Дзянісаў кажа, што адмысловай праграмы для выступа яны не рыхтавалі.

— Нічога новага не рыхтуем. Гасцей планавалі, але потым вырашылі, што ў Гародні нічога не будзем такога муціць. Мы і ў іншых гарадах ніякіх гасцей не запрашаем, звычайна. Бываюць выключэнні. У Віцебск звычайна прыязжае вялікая полацка-наваполацкая тусоўка нашых сяброў. Гэта нашыя, напэўна, самыя гарачыя сябры, негледзячы на тое, што з поўначы, — усміхаецца Алесь. — З Полацака — Кастусь «Кастэла» Путронак — які спяваў «Косю» на альбоме, і цяпер традыцыйна ў Віцебску спявае гэтую песню разам з намі.

Традыцыйна на лірычных песнях наведвальнікі прысядалі на падлогу і ўключалі запальнічкі. На песні «Надпіс на камені пад крыніцай» некаторыя мужчыны знялі шапкі. А пасля «Сумнага рэгі» наведвальнікі ўшанавалі хвілінай маўчання ўсіх загінулых за Беларусь. Выступ цягнуўся больш за дзве з паловай гадзіны.

Сутыкнуліся з цэнзурай

Раней паведамлялася, што Dzieciuki не змогуць выканаць некаторыя песні - прагучаць толькі тыя, якія ўказаныя ў «гастрольцы». На канцэрт меліся прыйсці прадстаўнікі ўлады і прасачыць за гэтым. Алесь Дзянісаў кажа, што з такім яны сутыкаюцца ўпершыню — у іншых гарадах ці проста адмаўлялі, ці давалі дазвол без усялякіх умоваў. Гурт пагадзіўся з гэтым, каб не падводзіць арганізатараў і публіку.

Па чутках, у музыкантаў хутка выйдзе новы кліп. Але лідар пакуль трымае гэта ў сакрэце.

— У нас шмат планаў і ідэяў. Зараз не хочацца раскрываць усе планы. Галоўнае, што гурт працягвае жыць!