Гэтым разам мы выбралі кафэ «Хатэй», кавярні «У доме Хона Піка» ды «Ці&Кава» і бар «Карчма». Мы не прэтэндавалі на тое, каб ахапіць увагай усе аспекты дзеяння ўстановаў і даць канчатковую экспертную ацэнку іх працы. Наш рэйтынг — гэта спроба праверыць, наколькі замежніку ўтульна і камфортна ў гродзенскіх кавярнях.
Для аб’ектыўнасці мы распрацавалі ўласную шкалу ацэнкі. За крытэрыі ўзялі:
— наяўнасць меню на англійскай мове;
— валоданне афіцыянтамі англійскай мовай;
— наяўнасць wi-fi;
— магчымасць аплаты карткай;
— якасць ежы і напояў (выключна суб’ектыўнае меркаванне ўдзельнікаў);
— музыка і інтэр'ер.
Для ацэнкі ўзроўню сервісу замест зорак Мішлена выкарыстоўвалі Аленяў cвятога Губерта. Максімальная ацэнка за любы паказчык — 5 аленяў, мінімальная — 1 алень.
У першай частцы гайда мы наведалі гастра-бар «Вердэн», кавярню «Я», «Рэтра-піцу», «Раскошу», «Камунарку» і «Стары горад».
[irp posts="38 598″ name="Дзе ў Гродне турысту смачна з’есці. Тэст установаў харчавання з ацэнкай у аленях Святога Губерта"]
Кафэ «Хотей». «Под пивко» будзе добра і так
«Хотей» нядаўна адкрыўся на месцы легендарнай у Гродне «Чабурэчнай», але чабурэкаў мы там не знайшлі. У меню былі сушы, піца, напоі ды дэсерты.
Меню на англійскай установа не мае. А цікава было б даведацца, як бы яны пераклалі «ролл под пивко». Прынамсі, з піва кафэ прапануе «Аксамитное темное». Keep calm ды лупіце на трасянцы ў «Хотей».
Афіцыянт Кірыл трохі разумеў па-англійску, таму змог прыняць замову. «Хотей» мае ўласную сетку wi-fi і туалет, які быў чамусьці зачынены. Памяшканне нанова адрамантаванае, грае прыемная музыка, таму не дзіва, што ў залі шмат наведвальнікаў.
Як слушна заўважыў адзін з турыстаў, «Хотей» адсутнічае ў сацыяльнай сетцы Фэйсбук. Таму пакінуць водгукі замежныя турысты могуць хіба што ў Інстаграме, бо сеткай ВКонтакте карыстаецца ў асноўным рускамоўная моладзь.
Да якасці ежы і напояў пытанняў мы не мелі, яны суадносяцца з цэнамі.
Аднак да самай смачнай піцы і сушы ў горадзе «Хотею» яшчэ ёсць куды цягнуцца. Таму ўстанова атрымлівае 3,8 аленяў святога Губерта з пяці.
Кавярня «У доме Хона Піка». Дэсэрты смачныя, а кава — не вельмі
Кавярня знаходзіцца ў самым цэнтры горада, таму мае ўсе шанцы прывабіць замежнага турыста. Утульны стылёвы інтэр'ер, грае прыемная музыка, за суседнімі столікамі гродзенцы няспешна п’юць каву ды глядзяць у смартфоны. Як пажартаваў адзін з турыстаў нашай групы, адчуваеш сябе як у Еўропе, а не на вуліцы Савецкай!
Але на гэтым плюсы ўстановы скончыліся: меню на англійскай мове кавярня не мае, дзяўчаты па-англійску ўвогуле не разумелі, wi-fi для наведвальнікаў няма. Ёсць туалет, дзякуй і на гэтым.
Смак кавы таксама пакідаў жадаць лепшага, але мы адзначылі, што дэсерты ў «Доме Хоне Піка» сапраўды смачныя. Варта пакаштаваць! А пакуль «Кавярня ў доме Хона Піка» атрымлівае 2,8 аленя з пяці.
Бар «Карчма». За базар адказваюць
Прыемна адзначыць, што «Карчма» робіць пэўныя крокі да беларускасці: на століках прыгожа засцелены традыцыйныя рушнікі, бар прапануе турыстам пачаставацца «смакамі старой Гародні». «Карчма» мае меню на англійскай і на польскай мовах, але афіцыянт Андрэй размаўляў выключна па-руску.
Цікава адзначыць, што ў залі ціха гралі замежныя хіты 90-х: я пазнала California love і Come along with me. Меркаваннем аднаго з замежных гасцей, заходняя поп-музыка той эпохі заўсёды лепш за рускую папсу таго ж часу. Слушная заўвага. Ад сябе дадам, што музычны густ «Карчмы» расце.
Але цалкам развітацца з блатной атмасферай 90-х тут пакуль не хочуць: у меню сустракаюцца «Крылышки по блату» и «Птичий базар». Адзін з турыстаў нашай групы выказаў думку, што гэта месца можа быць любімым сярод супрацоўнікаў праваахоўчых органаў і КДБ. Вырашылі размаўляць цішэй.
«Карчма» здзівіла замежнікаў памерам порцый і якасцю страваў: маўляў, у суседняй Літве такое б каштавала ў 2−3 разы даражэй! На жаль, «Карчма» не мае wi-fi, таму атрымлівае ад нас толькі 3,8 аленя. У натуры, не благі вынік.
Кавярня «Ці&Кава». Nice to talk to you
«Ці&Кава» не мае меню на англійскай мове, але барыста Влад няблага ведае мову. Варта адзначыць, што моладзь у Беларусі не вельмі добра валодае замежнымі мовамі ў параўнанні з прыбалтамі ды палякамі, гэта прызнаюць таксама і турысты. Таму было асабліва прыемна замовіць кубачак кавы па-англійску, а не «на мове жэстаў». Кава турыстам спадабалася.
Таксама адзначылі, што ў «Ці&Каве» адчуваюцца city vibes — гарадскія флюіды. У кавярні ёсць wi-fi. Агулам яна набрала ў нашай шкале 4,3 аленя з пяці.
Месца, вартага адзнакі ў 5 аленяў, гэтым разам знайсці не атрымалася. Спадзяемся, нам пашанцуе наступным разам.
Агульны рэйтынг другога агляду выглядае наступным чынам:
[irp posts="49 900″ name="У Гродне выдалі карту-трансформер для турыстаў з гідам аленем Лявонам"]
