Глядзіце, як на заводзе пад Гродна робяць дэкор для Старога замка

Гродзенскае прадпрыемства “Будоўля” ў сярэдзіне снежня выйграла тэндар па вытворчасці і мантажы каменных элементаў на Старым замку. За рэалізацыю праекта ўзялося адно з падраздзяленняў прадпрыемства – камнеапрацоўчы завод. Hrodna.life пабываў на вытворчасці і ўбачыў, як рыхтуюцца дэталі ўязной брамы замка.

“Ганарымся гэтым заказам”

На заводзе сёння актыўна робяць дэкаратыўныя каменныя элементы, некаторыя з іх ужо мантуюць на Старым замку. Над рэалізацыяй праекта працуюць высокакваліфікаваныя спецыялісты: скульптары, разьбяры па камені, інжынеры, аператары і іншыя.

“Мы ганарымся, што нам далі магчымасць сябе праявіць на Старым замку. Мы імкнуліся да гэтага і не хацелі, каб іншыя арганізацыі працавалі ў нашым горадзе, – распавядае дырэктар камнеапрацоўчага завода Віталь Міскель. – Для іх гэта быў бы чарговы аб’ект, а для нас – гонар і аднаўленне помніка архітэктуры ў родным горадзе. Тут мы жывем, тут будуць жыць нашы дзеці і ўнукі – і мы стараемся ўсё зрабіць якасна, як гэта выглядала некалькі стагоддзяў таму”.

Глядзіце, як на заводзе пад Гродна робяць дэкор для Старога замка
Кіраўніцтва “Будоўлі” і камнеапрацоўчага завода абмяркоўваюць праект Старога замка

Рэалізацыя праекта з замкам для завода – гэта стабільная праца на бліжэйшы год.

“Гэта работа дасць нам магчымасць падняцца на прыступку вышэй”, – дадаў Віталь Міскель.

Глядзіце, як на заводзе пад Гродна робяць дэкор для Старога замка
Скульптар Уладзімір Панцялееў паказвае дырэктару “Будоўлі” Паўлу Бузуку маскарон на ўязныя вароты Старога замка

Пясчанік прывезлі з Польшчы

Асноўная задача на заводзе на 2019 г. – зрабіць скульптурна-мастацкія элементы на знешнія сцены замка: кесоны, маскароны, розныя гербы і вонкавыя карнізы. Іх робяць з прывезенага з Польшчы пясчаніку.

Элементы ствараюцца паводле матэрыялу, сабранага архітэктарамі і праекціроўшчыкамі рэканструкцыі Старога замка. Нагадаем, за аснову рэканструкцыі ўзяты замак часоў караля Стэфана Баторыя, як лічыцца, працы вядомага італьянскага архітэктара Санці Гучы. Хоць, гісторыкі дагэтуль не ўпэўнены, хто менавіта быў аўтарам праекта замка.

Эскізны праект рэканструкцыі распрацаваў мінскі архітэктар Уладзімір Бачкоў, які ў 80-90-я гады мінулага стагоддзя займаўся перадпраектнымі даследаваннямі. Цягам першай чаргі рэканструкцыі (брама-вежа і сцяна над Нёманам) праект Бачкова мяняўся і дапрацоўваўся.

Цяпер распрацоўваецца праект інтэр’ераў Старога замка: на іх выкананне будзе праведзены асобны конкурс.

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.

Перадрук матэрыялаў Hrodna.life магчымы толькі з пісьмовага дазволу рэдакцыі. Звяртайцеся info@hrodna.life

Каментары

Spelling error report

The following text will be sent to our editors: