«Да кожнага патрэбен індывідуальны падыход». Як у Гродне дапамагаюць дзецям з інваліднасцю

Напярэдадні міжнароднага дня інвалідаў, які адзначаецца 3 снежня, hrodna.life пабываў у гродзенскім «Цэнтры медыцынскай рэабілітацыі дзяцей-інвалідаў». Установа дапамагае многім дзецям змагацца са сваімі захворваннямі ды моцна станавіцца на ногі.

Мэта Цэнтра — дапамога дзецям і падлеткам з інваліднасцю, перынатальнымi паражэннямі, парушэннямі з прычыны паражэння нервовай сістэмы і захворваннямі псіханеўралагічнага профілю.

Усяго ў гродзенскім Цэнтры займаецца больш за 60 дзяцей у дзень, у год іх колькасць перавышае за тысячу. З дзецьмі тут працуе больш за 80 спецыялістаў.

Цэнтр дапамагае па-рознаму: ёсць медыцынская, псіхалагічная, лагапедычная, сацыяльная і іншыя віды рэабілітацыі. Рэабілітацыйны курс уключае лячэбную фізкультуру, масаж, гiдракiнеза-, святло-, цепла-, механа- і рэфлексатэрапію. Ёсць таксама псіхолага-педагагічная і лагапедычная дапамога.

Інструктар-метадыст Цэнтра Таццяна Цімошына распавядае, што кожнаму дзіцяці курс рэабілітацыі падбіраюць індывідуальна.

«Інструктар-метадыст па фізічнай рэабілітацыі распрацоўвае рэабілітацыйныя праграмы, праводзіць заняткі і навучае бацькоў элементарным асновам лячэбнай гімнастыкі. Праца рэабілітолага з дзецьмі нашага профiлю — гэта велізарная адказнасць, сацыяльная значнасць, самааддача. Цяжкая фізічная праца і эмацыйная нагрузка штодня прысутнічаюць у працы.

Усе дзеці розныя, гэта патрабуе падвышанай уважлівасці, знаходлівасці, заўсёды пазітыўнага настрою. Задача не проста правесці працэдуру, але і стварыць спрыяльную эмацыйна-пачуццёвую атмасферу. Для кагосьці спяваем, з кімсьці размаўляем, камусьці хапае проста ўсмешкі і зрокавага кантакту».

Спецыялістам трэба старанна сачыць за кожным дзіцём, бо складанасць працы на трэнажорах выстаўляецца індывідуальна, але ў многіх дзяцей нават мінімальная нагрузка выклікае цяжкасці.

Заняткі для дзяцей у цэнтры праходзяць у спецыяльна абсталяванай зале. У працы выкарыстоўваюцца трэнажоры, якія дапамагаюць нагрузіць або паслабіць пэўную групу цягліц, дапамагчы ў засваенні руху, аказаць агульнаўмацавальнае дзеянне: бегавая дарожка, кампутарны велагеймiк, стэперы, гімнастычныя палкі, фітбол, уцяжарвальнікi, масажныя дарожкі, спецыялізаваныя лячэбныя касцюмы ADELI.

Галоўны ўрач Цэнтра Галіна Каляда распавядае, што ва ўстанове створаны ўсе ўмовы для рэабілітацыі дзяцей.

«Наш Цэнтр прызначаны для аказання рэабілітацыйнай дапамогі дзецям ва ўзросце з трох месяцаў і да 17 гадоў уключна. Мы прымаем у сябе дзяцей з Гродна і вобласці. Нашым пацыентам важны кожны від рэабілітацыі, бо толькі пры пастаянным і комплексным падыходзе будзе дасягацца максімальны станоўчы эфект. Нельга абмежавацца якім-небудзь адным або двума відамі ў некалькі курсаў, важна паслядоўна і рэгулярна займацца».

Планавая магутнасць Цэнтра — 50 ложкаў, з якіх:

— 24 стацыянарныя ложкі для кругласутачнага знаходжання дзяцей ва ўзросце ад 3-х гадоў да 17 гадоў уключна з тэрмінам рэабілітацыі 28 сутак, 5-разовым харчаваннем; шпіталізацыя дзяцей у стацыянар ажыццяўляецца без бацькоў.

— 12 ложкаў дзённага стацыянара для дзяцей ва ўзросце ад 3-х гадоў да 17 гадоў уключна з тэрмінам рэабілітацыі 28 сутак з працягласцю змены ад 6 да 10 гадзін, 3-разовым харчаваннем; шпіталізацыя дзяцей ажыццяўляецца без бацькоў.

— 14 ложкаў дзённага знаходжання для дзяцей з 3-х месячнага ўзросту з тэрмінам рэабілітацыі да 21 сутак. Працягласць змены да 4 гадзін і канкрэтна вызначаецца кiруючым лекарам з улікам індывідуальных асаблівасцяў дзіцяці і рэабілітацыйных мерапрыемстваў; харчаваннем і койкамі для пражывання хворыя не забяспечваюцца.

Гродзенскі «Цэнтр медыцынскай рэабілітацыі дзяцей-інвалідаў» знаходзіцца па адрасе: бульвар Ленінскага камсамола, 35.
Тэлефон для даведак: 8 (0152) 48-02-77