Гродзенскі калекцыянер, уладальнік «Цікавага музея» Алег Ёрш 7 жніўня адкрывае на Тэлеграфнай, 14 бар новага фармату. «На провадзе» задуманы як бар з лёгкай закускай і музеем. Пра ідэю незвычайнага месца ўладальнік распавёў Hrodna.life.

Бар адкрываецца на вуліцы Тэлеграфнай, таму і назва сімвалічная — «На провадзе». Ідэя назвы належыць гродзенскаму мастаку Алесю Сураву.

«Інтэр'ер — гэта мая калекцыя, часткова з „Цікавага музея“, — распавядае Алег Ёрш. — Сталы і многае іншае зроблена з падручных сродкаў, я ўжо не першы год працую ў напрамку трэш-арту».

У бары можна ўбачыць больш за два дзясяткі старых тэлефонных апаратаў, халадзільнікі ў выглядзе гардэробных, плакаты розных эпох, а таксама савецкую тэлефонную будку 1960-х гадоў. Да ўсіх экспанатаў можна дакранацца і фатаграфавацца з імі.

«Такую будку ўжо не знойдзеш, а ў маёй калекцыі ёсць яшчэ адна, толькі старэй. Было б добра ўсталяваць яе каля бара. Упэўнены, людзі б з задавальненнем фатаграфаваліся. Але гэтае пытанне трэба ўзгадняць з архітэктурай», — кажа Ёрш.

Алег абяцае, што ва ўстанове будзе насычанае меню: рыбныя і мясныя закускі, розныя гатункі гарбаты і напоі ў паўлітровых слоіках, як у савецкія гады.

«Вернемся ў мінулае на некалькі дзесяцігоддзяў. У нас будуць кантаваныя шклянкі з падшклянкамі, савецкія талеркі і добрае меню. Упэўнены, у нашым бары будзе цікава ўсім. З першага разу яго „не перажуеш“. Сюды трэба будзе вярнуцца, таму што мы плануем абнаўляць меню і інтэр'ер. З 7 жніўня адкрыемся ў тэставым рэжыме, будзем глядзець, што трэба нашым кліентам».

Алег гатовы асабіста праводзіць экскурсіі па ўстанове і распавядаць гісторыю экспанатаў.

Алег Ёрш — гродзенскі калекцыянер. У 2017 годзе ён адкрыў «Цікавы музей» на вуліцы Замкавай. Там сабраны прадметы побыту мінулых стагоддзяў - больш за 600 экспанатаў. Таксама Алег працуе ў напрамку трэш-арту і праводзіць выставы па ўсё краіне.

Рэпарцёр, фатограф, краязнаўца. Самы хуткі журналіст Гродна на ровары. Руслана і яго ровар ведаюць многія гараджане: ад чыноўнікаў да бамжоў. Падчас службы ў войску быў разведчыкам, а цяпер даказвае, што выведнік былым не бывае. Працуе ў Hrodna.life з 2013 года, калі сайт яшчэ працаваў пад брэндам «Твой стыль». У канцы 2018 выдаў кнігу «Горад адзін, успаміны розныя», дзе сабраў успаміны гродзенцаў пра 1930−40-я гады.