Улады: «Гандлёвы цэнтр у Альшанцы застанецца»

Жыхары Альшанкі пачалі папяровую барацьбу з уладамі за кавалак зямлі на самым ускрайку мікрараёна. Там меў з’явіцца гандлёвы цэнтр з кавярняй, гатэлем, моладзевым цэнтрам і паркінгамі. Цяпер генплан хочуць змяніць. Але архітэктары суцяшаюць: «Гандлёваму цэнтру — быць».

Генплан абяцаў шопінг і каву

Жыхары Альшанкі не раз адчувалі сябе абдзеленымі. Жывуць яны далей за ўсіх. Школа перапоўнена — дзеці мусяць даязджаць у іншыя часткі горада. Няма нармальнай паліклінікі, толькі амбулаторыя ў жылым доме. Няма дзе культурна адпачыць з дзецьмі або дарослымі кампаніямі. На увесь раён дзейнічае тры, у асноўным прадуктовыя, крамы. І тыя засяроджаныя ў адным месцы.

Генплан абяцаў цэнтр, куды можна будзе пайсці на шопінг або на каву. Агульная плошча забаўляльнай і гандлёвай прасторы мелася быць 1500 «квадратаў». Участак пад яго знаходзіцца на рагу вуліц Францішка Багушэвіча і Айчыннай, недалёка ад былога Паўднёвага пасёлка. Самы ускраек мікрараёна, дзе няма ніводнай крамы.

Абмеркаванне ў форме інфармавання

Аднак гарадскія ўлады паведамілі, што плануюць змяніць першапачатковы план. Абвесцілі пачатак грамадскага абмеркавання ў форме «інфармавання фізічных і юрыдычных асобаў» працягласцю амаль месяц: з 30 студзеня па 23 лютага. У назве мерапрыемства прагучаў выраз «карэкціроўка праекта забудовы… пад шматкватэрную жыллёвую забудову». Фактычна, дамы замест забавы.

Подпісы «нязгоды»

Людзі абурыліся. І пачалі збіраць подпісы «нязгоды». Ужо ёсць некалькі сотняў. Мэта — каб супраць зменаў аб’ядналася большасць насельніцтва мікрараёна.

Прэтэнзій у сувязі з меркаванымі зменамі ў генплане некалькі:

• Не з’явіцца месцаў для адпачынку і крамаў. Цяпер тут гэтага не хапае.
• Не створаць працоўных месцаў для жыхароў у сваім раёне. Гандлёвы цэнтр мог бы паменшыць гэтую праблему.
• Пасля ўшчыльнення усім не хопіць парковачных месцаў.
• Аўтамабілі перапоўняць двары і створаць аварыйныя сітуацыі. А тут шмат дзяцей.
• Кіроўцы пачнуць паркавацца на газонах і шкодзіць прыродзе.
• Жыхары дамоў на Багушэвіча, 8, 10, 12 будуць глядзець суседзям у вокны, бо новыя шматпавярховікі вырастуць побач з імі.

— Генплан быў ужо зацверджаны. Многія жыхары планавалі набыць кватэру побач з гандлёвым цэнтрам. У нас яго не хапае. Вузкаспецыялізаваных прадуктовых крамаў тут не дастаткова. Раён забудаваны з боку былога пасёлка Фабрычнага, а з боку вёскі Вялікая і Малой Альшанкі няма інфрастуктуры. Ёсць магчымасць будаваць дамы на вольных плошчах. Навошта ўшчыльненне, — кажа Аляксандр Шарэйка, адзін з жыхароў Альшанкі.

Абмеркаванне яшчэ не скончылася і рашэнне яшчэ не прынятае, але на спрэчны ўчастак зямлі ўжо прыехала тэхніка і выйшлі рабочыя. Як яны патлумачылі жыхарам раёна, робяць геалагічныя даследванні, каб пабудаваць дамы. Пасля абураных званкоў у гарвыканкам геолагі зніклі.

Пад пагрозай толькі моладзевы цэнтр і паркінг

Апынулася, людзі не да канца зразумелі ўладу. Гандлёва-забаўляльны цэнтр хочуць адмяніць не цалкам, а толькі часткова.

Як патлумачыў намеснік галоўнага архітэктара горада Дзмітрый Вабішчэвіч, на гэтым участку планавалася будаўніцтва трох гандлёва-офісных будынкаў, у якіх маглі б размясціцца гандлёвы цэнтр з кавярняй, моладзевы цэнтр і гатэль, а таксама два шматузроўневых паркінгі.

— Навошта цяпер Альшанцы гатэль? А шматузроўневыя платныя паркінгі наўрад ці будуць карыстацца вялікім попытам, — разважае Дзмітрый Вабішчэвіч.

Карэкціроўка забудовы значыць, што замест будынка моладзевага цэнтра і аднаго паркінга хочуць пабудаваць тры шматпавярховікі на 2 і 4 пад’езды. Дамы меркавана стануць паралельна ўжо існуючым (Багушэвіча, 8, 10, 12) прыкладна на адлегласці 100 метраў ад іх.

— Ці гэта значыць вокны ў вокны? — задае рытарычнае пытанне архітэктар.

Дзмітрый Вабішчэвіч таксама растлумачыў, што гандлёва-забаўляльны комплекс планаваўся на ўвесь мікрараён Альшанка, большая частка якога яшчэ не пабудавана. Магчыма, пазней яго перанясуць на тую тэрыторыю, дзе цяпер ралля. Вядома, што інвестары цікавяцца гэтым кавалкам зямлі.

Наконт ушчыльнення раёна спецыяліст патлумачыў, што пакуль будаваць дамы ў мікрараёне больш няма дзе. Суседнія ўчасткі яшчэ не выведзеныя з ворных земляў.

Дзмітрый Вабішчэвіч мяркуе, што парковак мусіць хапіць усім. Цяпер іх колькасць мусіць быць 100%, а не 125% адносна колькасці кватэр, як раней. Адно, што ў колькасць машына-месцаў уваходзяць і шматузроўневыя паркінгі, адзін з якіх хочуць адмяніць, а другі з’явіцца толькі пры наяўнасці інвестара.

Як жыхары могуць паўплываць на рашэнне пытання?

Колькі жыхароў мусяць выказаць свой супраціў, каб да іх прыслухаліся? Заканадаўствам такая лічба не прадугледжана. Існуе панятак «колькасна». То бок, можна пісаць калектыўныя звароты, тлумачыць Дзмітрый Вабішчэвіч.

Ці гэта паўплывае на канчатковае рашэнне, невядома. Аднак досвед паліклінікі, якую так і не пабудавалі, вучыць, што і цяпер грамадскае абмеркаванне можа адбыцца толькі ў форме інфармавання: насельніцтву патлумачаць, чаму пабудова немэтазгодная.