Сядзібна-паркавы комплекс «Свяцк Гурскіх» знаходзіцца ў вёсцы Радзівілкі непадалёк ад Аўгустоўскага канала, за 30 км ад Гродна. Сядзібу з прылеглай тэрыторыяй на 5 га набыў на аўкцыёне ў 2011 годзе прадпрымальнік Віктар Барташэвіч. Ужо да лета ў планах адкрыць гасцініцу. Будзе тут і першы ў раёне Аўгустоўскага канала рэстаран. Пакуль жа гасцей па заяўках прымае піўніца — традыцыйны бар у падвале з арачнымі каменнымі столямі.
«А калі мы сюды прыехалі, усе знаходзіліся ў жаласным стане, — успамінае Віктар Барташэвіч. — Сядзіба памяняла некалькі ўладальнікаў, толькі вось многія гады нічога не рабілася».
Акрамя Радзівілак бізнесмен разглядаў і іншыя варыянты, але цяпер можа сказаць, што не шкадуе пра свой выбар. Адраджаюць старадаўнюю сядзібу пад дэвізам «Уся ўвага — дэталям» — працэс працаёмкі, адымае шмат часу, піша Сяргей Гаўрыцкі, БЕЛТА.
«Інакш нельга, — адзначае сын Віктара Аляксандр. — Месца з багатай гісторыяй, і хочацца ўзнавіць калі не поўную копію таго, што было, то як мінімум блізка да арыгіналу. Каб госці змаглі адчуць атмасферу адной з лепшых сядзібаў на тэрыторыі Беларусі канца пазамінулага — пачатку мінулага стагоддзя».
А месца сапраўды са сваёй гісторыяй. Яшчэ ў XVII стагоддзі яно спадабалася манахам-камедулам. Яны разбілі тут парк, стварылі каскад з пяці сажалак, якія напаўняюцца ключавой вадой. Стагоддзем пазней маёнтак стаў належаць Гурскім. У пачатку XIX стагоддзя з’явіўся будынак сядзібы. Пры Гурскіх парк папоўніўся рэдкімі раслінамі, з’явіліся вінаграднікі, крухмальны завод — маёнтак адносілі да разраду ўзорных. У пачатку XX стагоддзя сядзіба ўжо была папулярным месцам для турыстаў. Тут былі гатэльныя нумары і нават тэнісны корт.
Але, на жаль, наступныя гады безгаспадарлівасці наклалі свой адбітак. Шмат часу ў цяперашніх гаспадароў сышло толькі на расчыстку тэрыторый. Тады ж выявілася, што захаваліся ліпавая і ангельская алея з трохсотгадовымі дрэвамі. Аднавілі і ачысьцілі сажалкі. Планы ўладальнікаў звязаныя не толькі з развіццём паркавай зоны, але і вырошчваннем экалагічна чыстых прадуктаў. Першым крокам стала закладка яблыневага саду.
«Аднаўленне старадаўняй сядзібы — няпросты працэс. Казаць аб фінансавым складніку складана, сюды ўкладваюцца ўсе вольныя грошы», — прызнаецца Аляксандр Барташэвіч. У паездках, знаёмячыся з помнікамі архітэктуры, ён усё больш увагі стаў звяртаць на дэталі. «Я цяпер разумею, якая гэта сур’ёзная праца. Часам на дробныя, але важныя дэталі сыходзяць не гадзіны, а дні карпатлівай працы», — адзначае Аляксандр.
Ён паказвае столь над калонамі ўваходнай групы: немудрагелісты, на першы погляд, узор — ручная работа. Майстар правёў на вышыні каля месяца, ствараючы яго. Для таго, каб узнавіць інтэр'еры і знешні выгляд сядзібы, запрашалі прафесійных рэстаўратараў і дызайнераў. Дапамаглі і даваенныя фота, якімі падзяліліся браты Гурскага з Варшавы, бо менавіта ў Радзівілках прайшло іх дзяцінства.
Сядзіба для ўладальнікаў - гэта перш за ўсё бізнес-праект. «Вядома, ён не можа быць такім паспяховым, як бізнес у горадзе. Аднак свайго кліента, упэўнены, знойдзем», — лічыць Аляксандр Барташэвіч.
Вопыт вядзення бізнесу ў сферы гандлю, грамадскага харчавання і гасціннасці ў гаспадароў назапашаны немалы, ведаюць, на што арыентавацца. Стаўка будзе зроблена на высокі ўзровень сэрвісу і беларускую аўтэнтычнасць.
«Паглядзіце, у нас адкрываецца шмат устаноў грамадскага харчавання. Але ўсе яны таму ж госцю з Еўропы прапануюць добра знаёмую еўрапейскую кухню. Хіба гэтым можна здзівіць?» — сумняваецца Аляксандр. Таму іх рэстаран будзе з нацыянальным каларытам, гасцей будуць частаваць стравамі беларускай кухні.
«У тым, што Беларусь, яе гісторыя, архітэктура цікавая і замежнікам, і самім беларусам, мы пераконваемся пастаянна», — падкрэслівае Аляксандр. Сярод беларускіх турыстаў нямала маладых людзей, якія вандруюць па цікавых мясцінах. Сядзіба знаходзіцца на адным з веламаршрутаў вакол Аўгустоўскага канала, таму ў мінулым сезоне сюды зазіралі і велатурысты, у тым ліку замежнікі. А з улікам 10-дзённага бязвіза можна чакаць яшчэ большай колькасці гасцей.
Прыход бізнесу ўдыхнуў новае жыццё ў самі Радзівілкі. Заасфальтавалі дарогі, на трасе, якая вядзе ад Гродна да Аўгустоўскага канала, з’явіўся знак, які паказвае кірунак да гістарычнага аб’екту. Падтрымку ўладальнікі сядзібы атрымалі і ў выглядзе крэдыту на выгадных умовах для будаўніцтва гасцініцы. З адкрыццём комплексу «Свяцк Гурскіх» з’явяцца ў вёсцы і новыя працоўныя месцы.
На думку Аляксандра, заўсёды ёсць магчымасці рэалізаваць сябе на радзіме. Адна з іх — паказаць не толькі замежнікам, але і самім беларусам, што ў нас багатая гісторыя і нам ёсць чым ганарыцца.
«Магчыма, і наш вопыт стане для кагосьці прыкладам. Праца не з лёгкіх, але ад яе атрымліваеш сапраўднае задавальненне. Гэта важны ўнёсак не толькі ў гісторыю сям'і, але і ў гісторыю рэгіёну, краіны», — кажа Віктар Барташэвіч.
На сегодняшний день многие государственные учреждения имеют свои порталы с важной для вас информацией. Узнать, как зарегистрироваться на них можно на сайте. Теперь вы сможете быть ближе к государственным структурам.
