48-гадовы жыхар Ваўкавыска Іван Аненкаў трапіў у украінскі палон і звярнуўся да Аляксандра Лукашэнкі з просьбай дапамагчы яму вярнуцца дадому. Беларус раней быў асуджаны ў Расіі і ў месцах пазбаўлення волі яго завербавалі на фронт.
У сваім звароце ён заявіў, што прызнае сваю памылку — як грамадзянін Беларусі ён падпісаў кантракт з Міністэрствам абароны РФ і прымаў удзел у баявых дзеяннях. Аненкаў просіць «не пакідаць гэты зварот без увагі» і дапамагчы вярнуцца ў Беларусь да маці, сястры і сына.
Як Аненкаў трапіў у палон
Аненкаў (пазыўны «Стары», служыў у 164-й амсбр) быў узяты ў палон байцамі 18-й брыгады Нацгвардыі Украіны ў раёне населенага пункта Ямпаль. Гэта адбылося пасля таго, як яго штурмавую групу атакавалі ўкраінскія дроны, уключаючы цяжкі беспілотнік. У ходзе бою група была разгромлена, а сам Аненкаў праз нейкі час трапіў у палон, паведамляе Telegram-канал «Оперативный ЗСУ».
Як ён апынуўся на фронце
Іван Аненкаў раней ездзіў на заробкі ў Расію. Падчас адной з паездак яго асудзілі на 5 гадоў калоніі па артыкуле аб наўмысным прычыненні цяжкай шкоды здароўю (арт. 111 КК РФ). Пасля адбыцця часткі тэрміну ён падпісаў кантракт з расійскім ваенным ведамствам.
Па інфармацыі канала, спачатку яго разам з іншымі завербаванымі адпраўлялі на падрыхтоўку ў навучальныя цэнтры, а затым — практычна адразу на лінію фронту. На першым заданні ён наткнуўся на бліндаж украінцаў, дзе атрымаў раненне, але змог уцячы. Пасля ранення ён вярнуўся ў часць. Там ён канфліктаваў з афіцэрамі з-за таго, што не быў запоўнены часопіс баявых дзеянняў для атрымання выплаты за раненне.
Праз нейкі час мужчыну зноў адправіць на перадавую. У той жа дзень ён атрымаў раненне, але ён вярнуўся ў часць, а адтуль трапіў у шпіталь. Пасля праходжання лячэння яго адправілі на чарговае заданне: трэба было дабрацца да кропкі замацавання, то бок да апорнага пункта.
Аднак яго не было, таму Івану і іншым расійскім вайскоўцам давялося акопвацца самастойна. Падчас гэтага яны патрапілі ў поле зроку ўкраінскіх дронаў.
Вайна ва Украіне і беларусы: колькі ваююць і колькі загінула
Па стане на пачатак 2025 года ў складзе расійскай арміі налічвалася як мінімум 742 найміты з пашпартам Рэспублікі Беларусь, паведамляў праект «Хочу жить». У гэты спіс патрапілі не ўсе беларусы: некаторыя з іх могуць мець расійскія пашпарты, і яны не будуць лічыцца наёмнымі вайскоўцамі.
Паводле дадзеных праекта на канец 2025 года, за гады вайны загінулі не менш за 328 беларусаў, якія ваявалі на баку Расіі.
У той жа час на вайне загінула каля 100 беларускіх добраахвотнікаў, якія ваявалі за Украіну. Такія даныя прыводзіла кіраўніца місіі дэмакратычных сіл Беларусі ў Кіеве Святлана Шаціліна.
Дакладных звестак пра колькасць загінулых ва Украіне беларускіх добраахвотнікаў няма — гэтая інфармацыя засакрэчаная, каб не нашкодзіць іх родным у Беларусі. Але гэта адна з самых вялікіх нацыянальных груп у сілах абароны Украіны.
У 2024 годзе камандзір палка Кастуся Каліноўскага (гэта толькі адно з беларускіх падраздзяленняў у складзе УСУ) назваў колькасць чалавек, якія прайшлі праз полк — 5000.
