З 13 алтароў у Фарным касцёле спецыялісты адрэстаўравалі ўжо восем. Яшчэ пяць — у працы. Цяпер рэстаўратары займаюцца абразам Нястомнай Дапамогі - пакрываюць яго сусальным золатам, а таксама аднаўляюць алтар, паведамляе «Гродно Плюс».
Цяпер спецыялісты працуюць з абразам Нястомнай Дапамогі - з алтара Фарнага касцёла для рэстаўрацыі яго знялі ўпершыню. Зараз абраз пакрываюць сусальным золатам — гэта фінальны этап работ.
— Тут прыйшлося абкласці грунт, таму што яго падняло з-за таго, што была нейкая вільготнасць. Мы абклалі. Потым пойдуць таніроўкі і пакрыецца гэта ўсё лакам, — расказвае рэстаўратар Мікалай Лёля.
Па словах спецыяліста, самае галоўнае ў рабоце — «захаваць старое», а таксама «не нашкодзіць, каб не атрымалася зусім іншы абраз, не ўнесці свайго».
Аднаўляюць і сам алтар — працы вядуць ужо паўтары гады. За гэты час рэстаўратары замянілі зношаныя канструкцыі, аднавілі разьбу. Цяпер алтар грунтуюць, фарбуюць, а потым будуць залаціць. У рабоце выкарыстоўваюць толькі драўляныя матэрыялы.
Пробашч касцёла Ян Кучынскі дадае, што «каласальная праца» чакае каля алтара Святога Казіміра, які пацярпеў падчас Другой сусветнай. Побач з касцёлам узарвалася бомба — ударная хваля выбіла вокны.
— Акно некалі часова зробленае. Заладзілі дзірачку, і яно засталося па сённяшні дзень. І чакае сваёй чаргі, — дадае Кучынскі.
Адкрыць алтар Маці Божай Нястомнай Дапамогі плануюць да снежня 2025 года, калі касцёл будзе адзначаць сваё 320-годдзе.
Чытайце таксама: Фарны касцёл рыхтуюць да вялікай афарбоўкі: яе хопіць на наступныя 25 гадоў
