Пасля слоў Лукашэнкі аб навядзенні «жалезнага парадку» міліцыянты вобласці пачалі патруляваць запраўкі. Журналісты «Гродзенскай праўды» далучыліся да рэйду і не выявілі ні чэргаў на АЗС, ні «непарадку».
На нарадзе па эканамічных пытаннях 16 кастрычніка Аляксандр Лукашэнка выказаў незадаволенасць тым, што беларусы п’юць каву на аўтазапраўках, займаючы паркоўкі і замінаючы праезду. Ён даручыў дзяржсакратару Савета Бяспекі Аляксандру Вольфавічу перадаць кіраўніку МУС Івану Кубракову заданне разабрацца ў гэтым пытанні і навесці «жалезны парадак» да панядзелка, 20 кастрычніка.
Гродзенская вобласць не стала выключэннем.
— Створаны групы, якія правяраюць прыдарожныя кафэ і АЗС і сочаць за бяспекай руху, — распавёў начальнік ДАІ Гродзенскага аблвыканкама Генадзь Бяляўскі. — З уладальнікамі заправак праводзяць гутаркі аб неабходнасці захавання мер бяспекі і падзелу продажу паліва і прадуктаў.
Інспектары штрафаваць за каву не буду, а нагадаюць кіроўцам аб культуры паводзін і ўзаемнай павазе.
Чэргаў няма
Па словах работнікаў АЗС, невялікія чэргі часцей з’яўляюцца ў выхадныя, калі машын становіцца больш.
— Кіроўцаў, якія перашкаджаюць іншым, у нас няшмат. Ёсць касы самаабслугоўвання, імі карыстаюцца пры куплі кавы ці ежы. Усё праходзіць хутка, таму чэргаў амаль няма. Плюс заўсёды дзяжурыць супрацоўнік, які сочыць за парадкам, — распавяла супрацоўніца станцыі.
Асноўныя праблемы з чэргамі звязаны з арганізацыйнымі і чалавечымі фактарамі: аператары не заўсёды паспяваюць абслугоўваць усіх у гадзіны пік, а некаторыя кіроўцы самі ствараюць нязручнасці, выяўляючы няўважлівасць.
Што кажуць кіроўцы
Журналісты выдання адзначылі, што на запраўках усё спакойна. Большасць вадзіцеляў запраўлялі машыны і адразу з’язджалі. Тыя, хто хацеў перакусіць, аўтамабілі пакідалі на спецыяльнай паркоўцы.
— Часам даводзілася скандаліць, прасіць іншых кіроўцаў ад’ехаць, а ўжо потым піць каву. Добра, што гэтым пытаннем заняліся. Каб усім было зручна, трэба прыпаркавацца і толькі потым браць ежу ці напоі. Навесці парадак — правільнае рашэнне, — распавяла адна з наведвальніц.
Праўда, знайшоўся кіроўца, які пакінуў машыну ля калонкі і пайшоў за кавай. Чэргі за ім не было, але інспектары правялі з ім прафілактычную гутарку. У мужчыны не аказалася тэхагляду, хоць ён ужо атрымліваў прадпісанне прайсці яго.
— Я заўсёды сачу, каб не ствараць чэргі, бяру каву і адразу ад’язджаю, — патлумачыў ён.
Іншы кіроўца таксама падтрымаў неабходнасць парадку на запраўках:
— Машыну пакінулі ля калонкі, а самі пайшлі па гарбату ці каву. Гэта стварае нязручнасці.
Рэйды на Гродзеншчыне будуць працягвацца.
