У этна-краме «Цудоўня» цяпер прадаюць спешелці каву «Кава Hrodzienska». Склад напою распрацоўвалі сумесна з кампаніяй па абсмажванні кавы Daloni. Стваральнікі хацелі, каб смак перадаваў атмасферу Гродна.
«Моцны, сталы, саспелы, насычаны, поўны, глыбокі выразны смак. Ніякай легкадумнасці, ніякай мімалётнасці. Не жорсткі. Не рэзкі», — апісваюць смак напою ў Instagram-акаўнце «Цудоўні».
Аўтары дадаюць, што кава перадае «смак старога месца» і называюць напой «першым гродзенскім спешалці».
У распрацоўцы напою дапамагалі абсмажшчыкі Daloni Coffe. Брэнд заснавалі ў 2015 годзе. Прадстаўляюць каву з больш як 50 краін і рэгіёнаў, вырашчаную на плантацыях па ўсім свеце. Працуюць з кавярнямі ў Мінску.
Каву ўжо дадалі ў асартымент магазіна. Дастаўку напою ў іншыя гарады можна аформіць анлайн.
У Гродне ўжо рабілі брэндаваную каву
У 2016 годзе гродзенскі прадпрымальнік Вадзім зрабіў падарунак да 888-годдзя горада — вырабіў каву «Horodnia 1128». Напой прадавалі анлайн, а таксама ў двух крамах Гродна — «Баторыя» і «Сонечны».
У Гродне ёсць яшчэ адзін праект, які паспяхова працуе з брэндам горада. Гэта серыя травяных гарбат «Гарадзенская гарбата». Напоі прадаюць у «Цудоўне» і ў аптэцы-музеі на Савецкай, 4.
Чытайце таксама: Ад элітнага да даступнага: кароткая гісторыя кавы і гарбаты ў Гродне і Беларусі
