Драўляны будынак у стылі канструктывізму 1930-х на Міцкевіча, 1 у Гродне перабудуюць у трохпавярховы гатэль з рэстаранам і кафэ. Ад першапачатковай пабудовы ў гістарычным раёне Новы Свет застануцца толькі два фасады ў змененым выглядзе. Будаўніцтва паглыне і суседні аднапавярховы дом 1915 года пабудовы.
Мяркуючы па праекце, аб’ём першапачатковага будынка павялічаць, надбудаваўшы трэці паверх і прыбудаваўшы з боку Міцкевіча трохпавярховы аб’ём. Каменны аднапавярховы будынак, які стаіць ушчыльную, таксама павялічаць да трохпавярховага. Частка будынка, якая будзе на месцы арыгінальнага, паўторыць яго форму, будзе з дрэва і афарбаваная ў зялёны колер. Вокны павялічаць у даўжыню, апусціўшы ніжнія рамы ніжэй за карнізны пояс, адзначае канал Urban Hrodna.
Праект прадугледжвае:
- На першым паверсе размясціць вестыбюль гасцініцы, рэстаран на 50 месцаў і кафэ на 30 месцаў. Таксама плануюцца падсобныя памяшканні і міні-кацэльня на газу.
- На другім паверсе размясцяць 10 гасцінічных нумароў, на трэцім — 11. Таксама там будуць тэхнічныя памяшканні для абслугоўвання нумароў.
- У падвале — тэхнічныя і дапаможныя памяшканні для рэстарана.
- Будынак будзе забяспечаны халодным водазабеспячэннем, каналізацыяй, ацяпленнем ад газавага катла, вентыляцыяй і кандыцыянерамі.
- Для гасцей арганізуюць пяць парковачных месцаў з боку ўваходу па вуліцы Міцкевіча, адно — для людзей з інваліднасцю.
- Уваход для наведвальнікаў будзе з паўночнага фасада будынка. Праезд для загрузкі - з боку вуліцы Філарэта.
- Каля ўваходаў і праездаў будзе тактыльная плітка.
На тэрыторыі будаўніцтва (агульная плошча 0,2432 га) спілуюць дрэвы, пасля адновяць газоны, пракладуць дарожкі і азеленяць тэрыторыю. У залік васьмі спілаваных лісцевых дрэў арганізуюць кампенсацыйныя пасадкі 35 хвойных.
Падчас работ на тэрыторыі павінны будуць выконваць меры па абароне археалагічных аб’ектаў, бо яна ўваходзіць у зону аховы гістарычнага цэнтра Гродна. Праект распрацавала ТАА «ВКЛ праект».
Правядуць грамадскія абмеркаванні
Грамадскія абмеркаванні справаздачы аб ацэнцы ўздзеяння на навакольнае асяроддзе рэканструкцыі будынка на Міцкевіча, 1 у Гродне пройдуць з 23 красавіка 2025 года па 23 траўня 2025 года.
У гэты час усе зацікаўленыя асобы могуць азнаёміцца з дакументацыяй справаздачы аб ацэнцы ўздзеяння на навакольнае асяроддзе (АУНА), якая будзе даступная:
- На афіцыйным сайце Гродзенскага гарадскога выканаўчага камітэта ў раздзеле «Грамадскія абмеркаванні».
- У ТАА «ВКЛ-праект» і ТАА «Гандлёвы дом «ШАКОЦІС».
Прапановы і заўвагі можна накіроўваць у:
- Гродзенскі гарадскі выканаўчы камітэт, вул. Леніна, 2/1, г. Гродна, [email protected].
- ТАА «ВКЛ-праект», г. Гродна, вул. 17 Верасня, д. 8, [email protected].
- ТАА «Гандлёвы дом «ШАКОЦІС», г. Гродна, вул. Свабодная, д. 11, [email protected].
Таксама можна адпраўляць заяву аб неабходнасці правядзення грамадскіх слуханняў у Гродзенскі гарадскі выканаўчы камітэт на працягу 10 рабочых дзён з пачатку абмеркаванняў па адрасе: пл. Леніна, 2/1, г. Гродна, або на электронны адрас: [email protected].
Чытайце таксама: У суседнім з «Домам з драконамі» будынку на Міцкевіча адкрыюць краму. Праект абмяркуюць
Далучайцеся да тых, хто ўжо нам дапамагае, каб свабодны гарадзенскі голас не замаўчаў! Падтрымайце Hrodna.life данатам!
