У Гродне ліса разарвала ката: у адным з раёнаў горада жывёл усё больш

На Альшанцы жыхары бачаць усё больш лісаў. Адна з іх напала на ката і разарвала яго. Нагадваем, чым небяспечныя лісы і што рабіць, каб не заразіцца шаленствам.

Відэа з нападам падзяліліся чытачы NewGrodno.

Ліс сустракаюць у раёне вуліц Агінскага і Айчыннай. А яшчэ — у іншых раёнах.

Лісы часта пераносяць вірус шаленства. Хворыя жывёлы перастаюць пазбягаць людзей. У 2020 годзе ў Гродне зафіксавалі выпадак шаленства і ў цэнтры горада злавілі лісу. Аналіз паказаў, што яна хворая. У цэнтры горада аб’яўлялі каранцін.

Як пазбегнуць шаленства і што рабіць пры ўкусе жывёлы

Як не заразіцца, расказвае Гродзенскі абласны цэнтр гігіены, эпідэміялогіі і грамадскага здароўя:

• не чапайце бяздомных і дзікіх жывёл, асабліва калі яны агрэсіўныя, ці калі дзікія жывёлы не пазбягаюць вас, а наадварот, ідуць бліжэй;
• не прыносьце дадому дзікіх жывёл — калі яны не баяцца людзей, магчыма, яны хворыя;
• не купляйце жывёл без дакументаў;
• рабіце прышчэпкі хатнім гадаванцам;
• калі ў жывёлы з’явіліся дзіўныя сімптомы ці яна загінула без прычыны, тэрмінова звяртайцеся да ветэрынара.

Небяспечна таксама і калі сліна хворай жывёлы трапляе на слізістыя абалонкі вачэй, рота, носа і нават на скуру, дзе могуць быць нябачныя простаму воку пашкоджанні.

Што рабіць пры ўкусе?

• Прамыць рану вадой з мылам.
• Апрацаваць краі 5% растворам ёду.
• Накласці стэрыльную павязку.
• Неадкладна (на працягу сутак) звярнуцца да ўрача — ён ацэніць рызыку і пры неабходнасці прызначыць прышчэпкі.

Прышчэпкі ад шаленства — пакуль адзіны сродак. Курс складаецца з шасці ін'екцый па пэўнай схеме.