«Роял парк» на месцы рэзні. У цэнтры Гродна зносяць першы гродзенскі мясакамбінат (фота)

Амаль у цэнтры Гродна пабудуюць новы квартал таўнхаусаў з гучнай назвай «Роял парк». Ён з’явіцца на плошчах былога мясакамбіната на Камунальнай, 32, за стадыёнам. Зараз ідзе знос старых будынкаў. Калі будзе гатовы новы квартал і якія ўмовы?

Якім будзе новы квартал

На месцы рэзні пабудуюць 11 двухкватэрных блакаваных дамоў. Кватэры ў іх ужо прадаюцца. Яны будуць як у ЖК Барвіха (на вуліцах Старамалышчынская / Багушоўская), «толькі большыя, вышэйшыя, сучаснейшыя і ў цэнтры горада», удакладняе забудоўшчык. Кошт квадратнага метра — $ 1250. Кватэра плошчай 127 кв. м будзе каштаваць ад $ 158 750 (ад 503 618 рублёў). Тэрыторыя будзе закрытая, са шлагбаумам, участкам у дзве соткі для кожнай кватэры і ўласнай паркоўкай на два месцы. У дамах абяцаюць трохметровыя столі і свабодную планіроўку.

Праект квартала распрацоўвала фірма «АртПраПраект» — аўтары гандлёвага цэнтра на Кляцкова каля Triniti і іншых. Забудоўшчык «Астострой» таксама будаўнік таўнхаўсаў у раёне вуліцы Старамалышчанскай у мікрараёне Забалоць.

Квартал плануюць здаць у пачатку 2026 года.

Акрамя таго, у раёне будучай забудовы на продаж выставлены двухпавярховы адміністрацыйна-складскі комплекс плошчай у 1353 кв.м і частка адміністрацыйна-гандлёвага будынка плошчай 47 кв. м пад офісы. Мяркуючы па ўсім, іх захаваюць.

Помнік прамысловай архітэктуры

У пачатку ХХ стагоддзя тут была гарадская рэзня — мясакамбінат. З яе пачалася гісторыя прамысловай перапрацоўкі мяса ў Гродне. Самы стары будынак тут — склад 1912 года, плошчай амаль 2,5 тыс. кв.м. Большасць пабудоў ужо савецкага часу. Ёсць вежа і басейн (тэхнічны вадаём) у 218 кв.м з бетонным дном. Падобна, што іх зносяць. З 1970-х мясакамбінат пераехаў і пабудовы перасталі выкарыстоўваць па прызначэнні.

Участак прадавалі з 2019 года. Разам з 16 пабудовамі яго выкупіла фірма «Астострой» за 570 150 руб. ($ 180 тыс.) у жніўні 2023 года. Цана ад першапачатковай знізілася ўдвая.