Літоўскія памежнікі выявілі падземны ход даўжынёй 25 метраў у раёне вёскі Пашальчай, каля мяжы з Беларуссю. Мяркуецца, што тунэль выкарыстоўвалі для незаконнай перавозкі тавараў.
Саветнік Службы аховы дзяржаўнай мяжы Гедрус Мішуціс пацвердзіў знаходку тэлерадыёкампаніі LRT, але адмовіўся раскрываць падрабязнасці, спаслаўшыся на тое, што расследаванне яшчэ вядзецца. Паводле яго слоў, афіцыйная заява з дэталямі будзе апублікавана пазней.
Вёску Пашальчай у Шальчынінкайскім раёне аддзяляюць ад Беларусі плот і вузкая рака Шальчэ. Месца выяўлення тунэля ахоўваюць памежнікі, і трапіць туды без спецыяльнага дазволу пракурора немагчыма. Мясцовасць мяжуе з Воранаўскім раёнам Гродзенскай вобласці.
Чытайце таксама:
- Начальніка лакаматыўнага дэпо Гродна асудзілі за хабар — ён дапамагаў з кантрабандай цыгарэт
- У «Беняконях» затрымалі кантрабандыста-агародніка. Ён хаваў пад адзеннем насенне
Шары губляюць папулярнасць, кантрабанды ловяць усё менш
Кантрабандысты працягваюць шукаць новыя спосабы абыходу загародаў, выкарыстоўваючы GPS-датчыкі, зашыфраваныя перамовы і нават паветраныя шары. Кіраўнік Службы аховы дзяржаўнай мяжы Літвы Рустам Лубаеў адзначыў, што выкарыстанне шароў скарачаецца. З пачатку 2025 года было перахоплена 20 тысяч пачак кантрабандных цыгарэт. Летась да снежня 2024 года памежнікі затрымалі больш за 1,2 мільёна пачак нелегальнага тытуню — гэта ўдвая менш, чым за той жа перыяд у 2023 годзе.
