Затрыманні дальнабойшчыкаў, прыход міліцыі, паведамленні ад сілавікоў. Як прайшоў тыдзень у Гродне і вобласці

На мяжы за апошнія некалькі дзён затрымалі не менш за 20 дальнабойшчыкаў. Да актывіста Мікалая Уласевіча з мястэчка Варняны прыйшлі з аглядам. Перад прэзідэнцкімі выбарамі эмігранты сталі атрымліваць паведамленні ад сілавікоў. Рэдакцыя Hrodna.life вывучыла, што адбылося ў вобласці з 20 па 26 студзеня.

На мяжы за тыдзень затрымалі не менш за 20 дальнабойшчыкаў

У кіроўцаў правяралі мабільныя тэлефоны, шукаючы лайкі, падпіскі і каментары на «экстрэмісцкія» рэсурсы. Гэтыя праверкі праводзіліся незалежна ад таго, як доўга кіроўцы знаходзіліся за межамі Беларусі, піша Telegram-канал «Суды, задержания. Гродно и область».

Новыя палітвязні

Вітальд Шалкевіч са Свіслацкага раёна 21 студзеня прызнаны палітзняволеным.

Папаўненне спісу экстрэмісцкіх матэрыялаў

• TikTok-акаўнт «blue_eyed_one3257» (па рашэнні суда Лідскага раёна ад 16 студзеня 2025 года),

• Канал «Беларуский OSINT «Феникс» на YouTube, візуальны матэрыял і тэкст «Беларуский OSINT «Феникс» (па рашэнні суда Ленінскага раёна Гродна ад 22 студзеня).

Новыя «тэрарысты»

23 студзеня сем гродзенцаў папоўнілі спіс «тэрарыстаў». Іх судзілі за распальванне сацыяльнай варожасці і масавыя беспарадкі. Сярод тых, хто папоўніў спіс:

• Сандракула Максім Валер’евіч
• Шалкевіч Вітальд Стэфановіч
• Антонава Наталля Паўлаўна
• Церабей Леанід Іванавіч
• Колабаў Дзмітрый Аляксандравіч
• Голуб Дзмітрый Уладзіміравіч
• Дамастрой Вікторыя Валянцінаўна

Новыя «экстрэмісты»

Сандракула Максім Валер’евіч, Чуковіч Аляксандр Мікалаевіч, Курыловіч Вадзім Іванавіч, Міленкевіч Яўген Вячаслававіч, Звягаў Аляксандр Валянцінавіч з Гродна 24 студзеня папоўнілі спіс «экстрэмістаў».

У Гродне ліквідавалі арганізацыю «Палітра Міра»

Міжнароднае грамадскае аб’яднанне «Палітра Міра» ліквідавалі за некалькі пасяджэнняў у лістападзе 2024 года ў Гродзенскім абласным судзе, піша Telegram-канал «Право имеют».

Цяпер арганізацыя знаходзіцца ў стадыі ліквідацыі. Яна прапрацавала ў Мастах больш за 20 гадоў.

4 жыхароў вобласці судзілі за распаўсюд экстрэмісцкіх матэрыялаў

Па арт. 19.11 КаАП «Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць» судзілі жыхароў Ліды, Навагрудка, Гродна і Воранава.

Да актывіста Мікалая Уласевіча з мястэчка Варняны прыйшлі з аглядам

У адзін з дзён датэрміновага галасавання да яго прыйшла міліцыя і правяла агляд дома на прадмет «экстрэмісцкіх матэрыялаў», піша «Гарадзенская вясна».

У снежні 2024 года яго аштрафавалі на 50 базавых велічынь у Астравецкім раённым судзе.

Паведамленні ад сілавікоў

Чытачка MOST паведаміла, што перад выбарамі яе муж атрымаў паведамленне ад сілавікоў. У ім адпраўнік праінфармаваў мужчыну, што ў Беларусі супраць яго распачатая крымінальная справа за паведамленні ў Telegram. «Раім не вяртацца. Усяго добрага», — прыпісаў адпраўнік.

Калі мужчына ад’язджаў з Беларусі, крымінальных ці нават адміністрацыйных спраў супраць яго не было. Аднойчы яго выклікалі «на гутарку» ў КДБ за данаты, але мужчына выплаціў на адзін з прапанаваных яму рахункаў суму ў 10-кратным памеры, і справу супраць яго не заводзілі. Пасля таго выпадку, у 2023 годзе, сям’я прыняла рашэнне з’ехаць з Беларусі.

У блогера Vadimati арыштавалі маёмасць у Беларусі

Пра арышт кватэры блогер і экс-палітвязень Вадзім Ермашук даведаўся з паведамлення Следчага камітэта. Ён размясціў яго ў Instagram. Падставай стала пастанова cледчага.

У Гродзенскай вобласці за год «экстрэмісцкімі» прызналі 140 рэсурсаў: тэмпы выраслі ўдвая

Суды разгледзелі і задаволілі ў 2024 годзе 140 заяў ад пракуратуры Гродзенскай вобласці аб прызнанні інфармацыйнай прадукцыі інтэрнет-рэсурсаў экстрэмісцкімі матэрыяламі. Лідзіруюць Telegram, Instagram і TikTok. Як змянілася дынаміка і да якіх наступстваў гэта прывяло?

У Ваўкавыску судзяць 16-гадовага студэнта. Ён сарваў сцяг

Жыхара Ваўкавыска Леаніда Трафімовіча пачалі судзіць 21 студзеня. Працэс па арт. 370 КК «Здзек з дзяржаўных сімвалаў» разглядаюць у закрытым судовым пасяджэнні.

Верагодна, абвінавачаны — гэта затрыманы ў лістападзе 2024 года 16-гадовы падлетак, навучэнец каледжа. Ён чакаў прыяцеля ў пад’ездзе на апошнім паверсе, узламаў замок дзвярэй і выйшаў на дах. Убачыўшы сцяг, падлетак дастаў складаны нож і зрэзаў яго, а дома схаваў у шафу. Супрацоўнікі ЖКГ заўважылі прапажу і звярнуліся ў міліцыю.

Уладальнік гродзенскага стрып-клуба выпусціў кліп на песню пра саюз Беларусі і Расіі

Гродзенскі прадпрымальнік Артур Рымша выпусціў кліп на песню «Дзве сястры» — у ёй мужчына спявае аб моцным саюзе Беларусі і Расіі. У роліку з’яўляецца і Яўген Якуш — балетмайстар гродзенскага драмтэатра.

Што такое сацыяльна небяспечнае становішча, якім ўздзейнічаюць на «палітычных»

Сям’ю Івановых (імёны і прозвішчы ў тэксце змененыя) у 2024 годзе паставілі на ўлік як змешчаную ў сацыяльна небяспечным становішчы (СНС). Прычына — бацьку сямейства затрымлівалі за распаўсюд «экстрэмісцкіх матэрыялаў». Івановы не вытрымалі ўмовы «выпраўлення» і з’ехалі з Беларусі. А ўжо ў пачатку 2025 года адміністрацыйны артыкул за «экстрэмізм» афіцыйна з’явіўся ў пераліку прычын, з-за якіх могуць паставіць сям’ю ў СНС. Журналістка Hrodna.life вывучыла, як ужываюць СНС у дачыненні да «палітычных» і «класічных» няўдалых сем’яў.

Сын дыякана з Гродна папрасіў пазбавіць візы дачку генерала — і правёў больш за тры гады ў турме

Сын гродзенскага дыякана Андрэй Аўсіевіч правёў за кратамі больш за тры гады па палітычнай справе. Зараз ён наладжвае новае жыццё ў Польшчы. «Калі я быў у ГУБАЗіКу, адзін з супрацоўнікаў паказаў мне мой каментар наконт дачкі аднаго мінскага генерала, якая тады вучылася ў Польшчы. Я там напісаў, каб яе пазбавілі візы. І губазікавец сказаў: маўляў, каб не гэты каментар, мы б цябе нават не шукалі», — расказаў хлопец.

Гродзенскі фатограф Сяргей Марозаў распавёў, што прымусіла яго з’ехаць і як даецца эміграцыя

Пра сацыяльны ліфт уніз і апошнюю кроплю для ад’езду сям'і распавёў у Instagram гродзенскі фатограф, навуковец і былы выкладчык фотажурналістыкі ў ГрДУ Сяргей Марозаў.

---