Для гродзенскіх дзяцей купяць квадракоптары. А так яны пад забаронай

Для Цэнтра творчасці дзяцей і моладзі «Спектр» у Гродне купяць восем квадракоптараў. На іх выдаткуюць 13 300 рублёў з гарадскога бюджэту. Раней улады паведамілі, што секцыя карыстаецца попытам у школьнікаў, таму колькасць дронаў планавалі павялічыць.

Дадаткова 4500 рублёў выдаткуюць на шэсць пультаў кіравання. Яшчэ 1560 рублёў - на шэсць акумулятараў.

Раней улады паведамлялі, што вучаць дзяцей карыстацца дронамі. Для гэтага ў школах праводзяць практычныя заняткі з рэальнымі мадэлямі. У першую чаргу — для выхаванцаў ваенна-патрыятычных клубаў.

У будучыні ўдзельнікі такіх клубаў будуць праходзіць на дронах паласу перашкод, адсочваць рух ад першай асобы з дапамогай акуляраў і працаваць з разведвальнымі дронамі.

Указ «Аб дзяржаўным уліку і эксплуатацыі грамадзянскіх беспілотных лятальных апаратаў» ад 25 верасня 2023 года забараніў увоз, захоўванне, абарот, эксплуатацыю і выраб беспілотнікаў, а таксама выкарыстанне паветранай прасторы Беларусі без дазволу. Карыстацца дронамі зараз могуць толькі арганізацыі і індывідуальныя прадпрымальнікі.

Што ў іншых цэнтрах?

Для Цэнтра творчасці дзяцей і моладзі «Прамень» закупяць тры праграмна-апаратных комплексы (праграмнае забеспячэнне):

• «Адпрацоўка навыкаў працы з вогнетушыцелем»,
• «Пакой памылак. Небяспека ў кватэры. Кампакт»,
• «Выклік службы МНС з сістэмай распазнання маўлення».

Усяго на гэта выдаткуюць 70 000 рублёў.

Чытайце таксама: Каля 15 беспілотнікаў забралі за год у жыхароў Гродзенскай вобласці