У Ленінскім раённым судзе Гродна разгледзелі справу аб прызнанні шлюбу, заключанага летам 2024 года, несапраўдным. Пара была нязгодная, але суд абраў не іх бок.
Пазоў падаў пракурор Гродна. Ён сцвярджаў, што шлюб паміж маладымі людзьмі быў фіктыўным — заключаным не дзеля стварэння сям'і.
Муж да гэтага вучыўся ў Гродзенскім медыцынскім універсітэце на бюджэце паводле мэтавай падрыхтоўкі. Пасля выпуску ў 2024 годзе яго размеркавалі ў Гомельскую гарадскую клінічную бальніцу. У чэрвені таго ж года пара зарэгістравала шлюб у ЗАГСе Гродна. Дзяўчына была вайскоўкай, і пасля вяселля муж змог перавесціся на працу ў Гродне, расказалі ў прэс-службе суда.
Пракурор настойваў, што іх шлюб быў заключаны толькі дзеля гэтага пераразмеркавання. Паводле яго слоў, пара не жыла разам, не вяла сумесны побыт, у кожнага быў свой бюджэт, а пасля вяселля яны правялі разам усяго паўгадзіны і раз’ехаліся па сваіх дамах. Яны не фатаграфаваліся як сям’я і не знаёмілі адно аднаго з роднымі. Калі дзяўчына хварэла і ляжала ў бальніцы, муж яе не наведваў.
Самі маладыя з абвінавачваннямі не пагадзіліся. Яны сказалі, што былі ў адносінах яшчэ да шлюбу, часам бавілі час разам пасля шлюбу і лічылі сябе парай. Яны прасілі суд адмовіць у пазове.
Суд разгледзеў доказы, выслухаў сведкаў і абодва бакі. Высветлілася, што сумеснага жыцця ў пары не было ні да, ні пасля вяселля. На гэтай падставе суд вырашыў, што шлюб быў фіктыўны. Шлюб прызналі несапраўдным з моманту яго рэгістрацыі і абавязалі пару заплаціць па 60 рублёў ад кожнага ў дзяржаўны бюджэт.
Ні хлопец, ні дзяўчына не сталі абскарджваць рашэнне суда, таму яно набыло моц.
Чытайце таксама: 21-гадовага курсанта з Гродна асудзілі на 15 гадоў за «здраду дзяржаве»
